Քոչարյանը՝ իրեն հասցեին մեղադրանքի մասին. Սա քաղաքական պատվերի դասական օրինակ է

ՀՀ երկրորդ նախագահ Ռոբերտ Քոչարյանն իրեն մեղավոր չի համարում, մեղադրանքը որակում է որպես իրականության հետ կապ չունեցող: Այս մասին նա հայտարարել է մարտի 22-ին կայացած դատական ​​նիստին։

Քոչարյանն ընդգծեց, որ գործարար Սիլվա Համբարձումյանի հետ ծանոթ չէ, իսկ մեղադրանքը բացարձակապես կապ չունի նախագահի լիազորությունների հետ։ Քոչարյանը հիշեցրեց, որ այն ժամանակ գործող օրենսդրությամբ նախագահը լիցենզիայի վաճառքի հետ կապված իրավասություն չուներ, իսկ վաճառքի համար համաձայնություն չէր էլ պահանջվում։

«Դա պարզապես ծիծաղելի է: Չգիտեմ, թե ինչից պետք է պաշտպանվեմ: Մեղադրանքը հիմնված է մեկ մարդու ֆանտազիայի վրա: Հասկանալի չէ, թե ինչու է դատախազությունը հիմք ընդունել այդպիսի մեղադրանքները»,- նկատեց երկրորդ նախագահը` հավելելով, որ գործում նման համաձայնության մասին ոչինչ չկա։ «Ես նախագահ եմ եղել և նման հարցերով երբեք չեմ զբաղվել ։ Գործում ոչ մի փաստ, ոչ մի նամակ, ոչ մի տող չկա այդ մասին»,- ընդգծեց Քոչարյանը։

«Սա քաղաքական պատվերի դասական օրինակ է,- ընդգծեց Քոչարյանը՝ կրկնելով ավելի վաղ ասվածը:- Մեղադրանքը հայտնվել է վերջին պահին, որպեսզի քննությունը գույքի վրա կալանք դնելու հնարավորություն ունենա, չէ որ սահմանադրական կարգի խախտման հոդվածը նյութական պատասխանատվություն չէր ենթադրում: «Սա քաղաքական պատվեր է` աբսուրդ, որը կապ չունի իրականության հետ»,- եզրափակեց Ռոբերտ Քոչարյանը, տեղեկացնում է News.am-ը։