ՄԱԿ Անվտանգության խորհուրդը մերժել է ՌԴ բանաձևը. Նեբենզյան խոսել է հետևանքների մասին

ՄԱԿ-ում ՌԴ մշտական ներկայացուցիչ Վասիլի Նեբենզյան քննադատել է Ռուսաստանի նախաձեռնած մարդասիրական բանաձևը ՄԱԿ-ի անվտանգության խորհրդի կողմից մերժելը։ Տեղեկությունը հայտնում է ՌԻԱ Նովոստին` հավելելով, որ դիվանագետը հայտարարել է՝ այդ մերժումը թույլ կտա Ուկրաինայի իշխանություններին հետագայում ևս մարդկանց օգտագործել որպես կենդանի վահան, ծանր զինատեսակներ տեղակայել քաղաքացիական ենթակառուցվածքի մոտ:

Ավելի վաղ ՄԱԿ-ի Անվտանգության խորհուրդն չէր ընդունել Ուկրաինայի վերաբերյալ Մոսկվայի նախագիծը, որով կոչ է արվում դադարեցնել կրակը խաղաղ քաղաքացիների տարհանման համար։ Նման պայմանավորվածություն էր ձեռք բերվել բանակցությունների հիման վրա, սակայն կրակի դադարեցման փաստաթուղթը չի հավաքել անհրաժեշտ 9 կողմ ձայները (15 ձայնից):

Փաստաթուղթը պաշտպանել են Ռուսաստանն ու Չինաստանը։ ՄԱԿ-ի Անվտանգության խորհրդի մյուս անդամները ձեռնպահ են մնացել։ Բանաձևի համահեղինակների թվում են Բելառուսը, Հյուսիսային Կորեան և Սիրիան:

Նեբենզյայի կարծիքով՝ անվտանգության խորհրդի հումանիտար բանաձևի բացակայությունն էապես կբարդացնի հումանիտար օգնության տրամադրումը, իսկ ուկրաինական կողմին թույլ կտա հետագայում ևս անտեսել հրադադարի ռեժիմի հաստատման պահանջները՝ հումանիտար միջանցքներով մարդկանց դուրս բերելու համար:

Իր հերթին ՄԱԿ-ում ԱՄՆ մշտական ներկայացուցիչ Լինդա Թոմաս-Գրինֆիլդը կարծում է, որ ուկրաինացիներին հումանիտար օգնություն ցուցաբերելու համար ՄԱԿ-ի Անվտանգության խորհրդին բանաձևը հարկավոր չէ:

«Մեզ պետք չէ այդ կեղծ բանաձևը, որպեսզի հումանիտար օգնություն ցուցաբերենք։ ԱՄՆ-ն ուկրաինացի ժողովրդին ավելի քան 600 մլն դոլարի մարդասիրական օգնություն է տրամադրել, և մենք կշարունակենք տրամադրել այնքան օգնություն, որքան անհրաժեշտ կլինի Ուկրաինային և հարևան երկրներին, որոնք իրենց մոտ ընդունում են ուկրաինացիներին»,–ասել է Թոմաս-Գրինֆիլդը, տեղեկացնում է Sputnik Արմենիա-ն։