Ռուսաստանը սահմանափակումներ է մտցրել ոչ բարեկամական երկրներում միջոցների տեղաշարժի համար

Ռուսաստանն՝ ի պատասխան Արևմուտքի կողմից իր ռեզերվների սառեցման, հայելային միջոցներ է կիրառել և սահմանափակումներ մտցրել ոչ բարեկամական երկրներում միջոցների տեղաշարժի համար։ Այս մասին հայտնել է ՌԴ Կենտրոնական բանկը։

Կարգավորիչը հիշեցրել է, որ ի պատասխան պատժամիջոցների՝ իշխանությունն արդեն արգելել է օտարերկրյա ներդրողների կողմից արժեթղթերի վաճառքը և միջոցների դուրսբերումը ռուսական ֆինանսական համակարգից, հաղորդում է «ՌԻԱ Նովոստին»։

«Ի պատասխան ռուսական ռեզերվների մի մասի սառեցման՝ Ռուսաստանը սահմանափակումներ է մտցրել դրամական միջոցների տեղաշարժի վրա, որոնք կարող են համադրելի գումարով փոխանցվել ոչ բարեկամական երկրներ»,- ասվում է Ռուսաստանի Բանկի տարածած հայտարարության մեջ:

Կենտրոնական բանկի տվյալներով՝ փետրվարի 18-ի դրությամբ միջազգային ռեզերվները հասել են պատմական նոր առավելագույնի՝ 643,2 մլրդ դոլարի։ Հունիսի 30-ի դրությամբ դոլարային ակտիվների մասնաբաժինը ընդհանուր պորտֆելում մեկ տարվա ընթացքում նվազել է 22,2 տոկոսից մինչև 16,4 տոկոս։

Ֆինանսների նախարար Անտոն Սիլուանովի գնահատմամբ՝ Ուկրաինայի պատճառով պատժամիջոցների նոր փուլերի արդյունքում Արևմուտքն արգելափակել է իր ոսկու և արժութային պահուստների մոտ կեսը՝ մոտ 300 միլիարդ դոլար։ Վլադիմիր Պուտինի խոսքով՝ ԱՄՆ-ն և Եվրամիությունը փաստացի չեն կատարել Ռուսաստանի հանդեպ իրենց պարտավորությունները, տեղեկացնում է News.am-ը: