Սեյրան Օհանյան․ Միամտություն է հավատալ, որ Ադրբեջանը կհրաժարվի իր հիմնական նպատակից

Միամտություն է կարծել, որ Ադրբեջանը կհրաժարվի իր հիմնական նպատակից՝ Արցախի հայաթափումից։ Այս մասին այսօր՝ մարտի 28-ին, հայտարարեց ընդդիմադիր «Հայաստան» խմբակցության ղեկավար Սեյրան Օհանյանը։

Նրա խոսքով, Ադրբեջանը Թուրքիայի հետ միասին իրականացնում է իրենց երկարաժամկետ ծրագրերը, որոնց համաձայն՝ ռազմավարական բարձունքներ են վերցվել՝ Արցախի բնակչության վրա ճնշումը մեծացնելու նպատակով։ «Այս տեսանկյունից անընդունելի եմ համարում առաջին հերթին Հայաստանի ղեկավարության կողմից մինչ այժմ իրականացված գործողությունները»,- ասաց նա։ Պատգամավորն ընդգծել է, որ անհրաժեշտ է ակտիվ աշխատել ռուս խաղաղապահների, Արցախի պաշտպանության բանակի և որոշ առումներով Ադրբեջանի հետ՝ հստակեցնելու, թե նրանցից յուրաքանչյուրը կոնկրետ ինչ գործողություններ և գործառույթներ է իրականացնելու։

«Արցախի բոլոր սահմանամերձ շրջանները, շփման գծին մոտ գտնվող բոլոր տարածքները, բոլոր բացերը պետք է լրացվեն: Ստեղծված իրավիճակը խոսում է այն մասին, որ ոչ Հայաստանի իշխանությունները, ոչ Արցախի իշխանությունները տեղյակ չեն իրական անվտանգության միջավայրին, որտեղ ապրում են, և համապատասխան միջոցներ չեն ձեռնարկել։ Այս տեսանկյունից ստեղծված իրավիճակի պատասխանատուն ներկայիս իշխանություններն են»,- ասաց ընդդիմության առաջնորդը։

Խոսելով խաղաղապահների վրա կատարվածի պատասխանատվությունը դնելու մասին՝ Օհանյանը նշեց, որ դա միանգամայն գործող իշխանության ոճով է, որն անընդհատ մեղավորներ է փնտրում՝ փորձելով խուսափել սեփական պատասխանատվության մասին խոսելուց։ «Հայկական բանակը, Արցախի պաշտպանության բանակն ունեն բոլոր հնարավորություններն ու ներուժը՝ արագ որոշումներ կայացնելու, իրենց շարքերը համալրելու և շփման գծում հարաբերությունները կարգավորելու համար։ Այն, որ դա չի արվել, նշանակում է, որ կա՛մ նրանցից դա չի պահանջվել, կա՛մ իրականում հստակ ցուցում չկա Հայաստանի իշխանությունների կողմից»,- ասաց նա։

Օհանյանը նշեց, որ այն պետությունները, որոնք ինքնուրույն չեն ապահովում իրենց անվտանգությունը, միշտ բախվում են ինքնիշխանության լուրջ խնդիրների, տեղեկացնում է Verelq.am-ը։