«ՔՊ»-ը Փաշինյանին իրավունք է տվել համայնքապետերի ԺՊ-ներ նշանակել

Հայաստանի Ազգային ժողովի՝ ապրիլի մեկին կայացած արտահերթ նիստում երկրորդ և վերջնական ընթերցմամբ պատգամավորները հավանության են արժանացրել մի շարք փոփոխություններ «Տեղական ինքնակառավարման մասին» օրենքում:

Օրենսդրական նախաձեռնությանը կողմ է հանդես եկել 57 պատգամավոր: Մինչդեռ 3-ը «դեմ» են քվեարկել:

Օրինագիծն, ըստ էության, հավանության է արժանացրել միայն խորհրդարանական մեծամասնությունը: «Դեմ» է հանդես եկել «Պատիվ ունեմ» ընդդիմադիր դաշինքի խորհրդարանական խմբակցությունը: Միևնույն ժամանակ «Հայաստան» ընդդիմադիր դաշինքի խորհրդարանական խմբակցությունը բոյկոտել է քվեարկությունը:

Օրինագծի հեղինակներից մեկը՝ «Քաղաքացիական պայմանագիր» իշխող կուսակցության պատգամավոր Վահագն Հովակիմյանը, նման շուտափույթ որոշումը մեկնաբանել է երկրի որոշ համայնքներում ստեղծված իրավիճակով: Նրա խոսքով՝ ՏԻՄ ընտրությունների արդյունքներով՝ համայնքների կառավարման գործընթացը խախտվել է:

Մասնավորապես, նման խնդիր է ի հայտ եկել Հայաստանի՝ մեծությամբ երրորդ քաղաքում՝ Վանաձորում:

«Անիշխանությունն այնտեղ տիրում է արդեն մի քանի ամիս, և հարցն իրավական լուծում չունի: Այդ իսկ պատճառով ստեղծված իրավիճակում «Քաղաքացիական պայմանագիրն» առաջարկում է հետևյալը. համայնքի ավագների խորհրդի նոր նիստն անցկացնել պաշտոնավարման մեկնարկից հետո 20 օրվա ընթացքում: Հակառակ դեպքում խորհրդի լիազորությունների ժամկետը վաղաժամ կդադարեցվի, իսկ վարչապետը կնշանակի համայնքապետի ժամանակավոր պաշտոնակատարին, մինչ համայնքի նորընտիր ղեկավարը կստանձնի իր պարտականությունները»,- մեկնաբանել է Հովակիմյանը, տեղեկացնում է News.am-ը: