ՀՀ ԱԳՆ․ Հադրութի եկեղեցու պղծումն Ադրբեջանի անհանդուրժողականության հերթական դրսևորումն է

ՀՀ արտգործնախարարությունը խստորեն դատապարտում է ադրբեջանական վերահսկողության տակ անցած Հադրութ քաղաքի Սուրբ Հարություն եկեղեցու նկատմամբ վանդալիզմի և սրբապղծման գործողությունները։ Այս հայտարարությունը տարածել է ԱԳՆ մամուլի քարտուղար Վահան Հունանյանը` անդրադառնալով եկեղեցու պղծման լուրերին։

Ավելի վաղ հայտնել էինք, որ Ադրբեջանը պղծել է Հադրութի եկեղեցին. խաչը հանել են, հայկական արձանագրությունը` ջնջել։

«Ադրբեջանի իշխանությունների կողմից ծրագրված կերպով իրականացվող այս գործողություններն Ադրբեջանի էթնիկ և կրոնական անհանդուրժողականության հերթական դրսևորումն է, ինչպես նաև Արցախն առանց հայերի ու հայկական հետքի թողնելու հետևողական քաղաքականության շարունակությունը»,- ասվում է հաղորդագրության մեջ։

Հունանյանը նշում է, որ Արցախում հայկական եկեղեցիների, մշակութային և կրոնական այլ հուշարձանների դեմ վայրագությունները կոպտորեն խախտում են միջազգային իրավունքի նորմերը, այդ թվում՝ ՄԱԿ-ի Արդարադատության միջազգային դատարանի կողմից 2021թ. դեկտեմբերի 7-ին կայացված հրատապ միջոցներ կիրառելու վերաբերյալ որոշումը:

Իսկ վերոհիշյալ դեպքը ևս մեկ անգամ վերահաստատվում է հայկական կողմի այն պնդումները, որ հրատապորեն անհրաժեշտ է իրականացնել ՅՈՒՆԵՍԿՕ-ի գնահատման առաքելության այցը Լեռնային Ղարաբաղ։

Հիշեցնենք, որ Սուրբ Հարություն եկեղեցին կառուցվել է 1621 թվականին, վերանորոգվել` 1819 թվականին, հենց այդ ժամանակ էլ տեղադրվել է եկեղեցու գմբեթը։

Սուրբ Հարություն եկեղեցին վերջին անգամ վերանորոգվել է 1999 թվականին Բաղդասարովի ֆինանսական օժանդակությամբ։ Պատերազմից առաջ Սուրբ Հարությունը գործող եկեղեցի էր, ռազմական գործողությունների ընթացքում չէր տուժել, տեղեկացնում է Sputnik Արմենիա-ն։