Արեստովիչ․ Իսրայելը կարող էր Ուկրաինային այնպիսի զենք տրամադրել, ինչպիսին Ադրբեջանն օգտագործել է ղարաբաղյան պատերազմում

Ռուսաստանի արտաքին գործերի նախարար Սերգեյ Լավրովի հակասեմական աղմկահարույց արտահայտություններից հետո Իսրայելն, ի վերջո, կարող է սկսել զենք մատակարարել Ուկրաինա։ Իհարկե՝ միջնորդավորված, երրորդ երկրների միջոցով։ Այս մասին ասել է Ուկրաինայի նախագահի գրասենյակի ղեկավար Ալեքսեյ Արեստովիչը ռուսաստանցի իրավապաշտպան Մարկ Ֆեյգինին տված հարցազրույցում։

Արեստովիչը նշել է, որ Իսրայելն այնպիսի զենք ունի, որն Ուկրաինային տրամադրել չի կարող ՆԱՏՕ-ն կամ ԱՄՆ-ը։

«Մենք տեսել ենք այդ ամենը ղարաբաղյան պատերազմում, դա կիրառել է Ադրբեջանի բանակը։ Օրինակ, Harop կամ Harpy տեսակի կամիկաձե-դրոններ։ Կա, օրինակ, Spike, հեռահար հակատանկային հրթիռային համալիր, որը թույլ է տալիս օպերատորին փոխել թռիչքի հետագիծը, վերաթիրախավորել այն. ուղղվել էր մի տանկի դեմ, բայց կարող է խոցել մեկ այլ տանկ։ Մենք տեսել ենք Ղարաբաղում հակատանկային նման շատ սպառազինություններ և այլն»,- ասել է նա։

Հիշեցնենք, որ Լավրովը Mediaset հեռուստաընկերության հարցազրույցում ասել էր, որ «Հիտլերը հրեական արյուն ուներ», և ասել էր, որ «ամենամոլի հակասեմականները, որպես կանոն, հրեաներ են»։ Նրա խոսքերը մեծ վրդովմունք են առաջացրել Իսրայելում, որտեղ, ինչպես և Ուկրաինայի ԱԳՆ-ում, Լավրովից պահանջել են ներողություն խնդրել։

Ի պատասխան՝ Ռուսաստանի ԱԳՆ-ն Իսրայելի կառավարությանը մեղադրել է միֆական «ուկրաինացի նացիստներին» աջակցելու մեջ, ինչից հետո Իսրայելը սկսել է հակվել դեպի Ուկրաինան, չնայած մինչ այդ փորձում էր չեզոքություն պահպանել, տեղեկացնում է News.am-ը։