Ադրբեջանը Լաչինի միջանցքում՝ Աղավնո գյուղի մոտակայքում, Էլեկտրահաղորդման գիծ է կառուցում

Ադրբեջանը Լաչինի միջանցքի սահմանին՝ Աղավնո գյուղի մոտակայքում էլեկտրասյուներ է դնում, Sputnik Արմենիային հայտնեց Աղավնոյի գյուղապետ Անդրանիկ Չավուշյանը։

Բաքուն իր վերահսկողության տակ անցած ՀԷԿ-ից էլեկտրահաղորդալարերի գիծ է կառուցում։ Չավուշյանի խոսքով՝ պայմանավորվածություն կար այն մասին, որ Ադրբեջանը աշխատանքներն անի միջանցքից դուրս՝ իրենց վերահսկողության տակ եղած սարի վրայով, սակայն, փորձելով շրջանցել մի մասում եղած ժայռոտ տարածքը (150-200 մ), հայտնվել են միջանցքում։ Չավուշյանը չի բացառում, որ ադրբեջանցիները միջանցք են մտել պատահաբար։

«Բայց մենք խաղաղապահների հետ բանակցեցինք, ադրբեջանցիները հետ քաշվեցին դեպի սահմանագիծ, որն անցնում է սարի վրայով»,- ասաց Չավուշյանը՝ նշելով, որ ոչ մի արտառոց բան չի եղել։ Նրա խոսքով՝ նման հարցերը բանակցությունների միջոցով են լուծվում՝ ռուսների միջնորդությամբ։ Ադրբեջանցիներն, ըստ Չավուշյանի, արդեն գնացել են։

Այնուամենայնիվ, նրա խոսքով, ստեղծված իրավիճակն արդեն փորձ է արվում օգտագործել քաղաքական «խաղերում», մասնավորապես՝ հակառուսական քարոզչության համար։

«Ամեն ինչ նորմալ է, ռուսական կողմը ապահովում է երկկողմ անվտանագությունը»,- ասաց Չավուշյանը։

Ընդհանուր առմամբ, ըստ գյուղապետի, ներկա իրավիճակի ու գյուղի ապագայի մասին բոլոր հարցերը պետք է ուղղվեն վարչապետ Նիկոլ Փաշինյանին, քանի որ հենց նա է ստորագրել նոյեմբերի 9-ի եռակողմ հայտարարությունը։

«Գաղտնիք չէ, որ նրանք (ադրբեջանցիները - խմբ․) շրջանցող ճանապարհ են կառուցում։ Մենք ենք, որ ոչինչ չենք անում, որովհետև հասկանալի չէ՝ գյուղը հանձնում ենք, թե ոչ»,- ասաց Չավուշյանը։

Նա հավելեց՝ մեկը չպետք է որոշի, որ մարդիկ պետք է հեռանան՝ թողնելով այն, ինչը տարիներով կառուցել են։

Նշենք, որ Ադրբեջանը Հայաստանից Արցախ այլընտրանքային ճանապարհ է կառուցում, որը շրջանցում է Բերձոր քաղաքն ու Աղավնո գյուղը։ Հայկական կողմը դեռևս այս ճանապարհի կառուցապատումը չի մեկնաբանել։

Բաքուն նախատեսում է, որ նոր ճանապարհով երթևեկության սկսվելուց հետո երկու բնակավայրն էլ կանցնեն Ադրբեջանի վերահսկողության տակ։