Իշխանությունները որոշել են հարված հասցնել իրենց վերահսկողության տակ չգտնվող Փաստաբանական դպրոցին

ՀՀ կառավարության 2021-2026 թվականների գործունեության ծրագրի, ինչպես նաև դատական համակարգի, փաստաբանության ոլորտի բարեփոխումների ռազմավարության համաձայն՝ նախատեսվում է մի շարք բարեփոխումների իրականացում։ Սա կարևոր ռազմավարական խնդիր է։ Այս մասին հունիսի 21-ին Ազգային ժողովում Մարդու իրավունքների պաշտպանության և հանրային հարցերի մշտական հանձնաժողովի նիստում «Փաստաբանության մասին» օրենքում փոփոխություններ և լրացումներ կատարելու մասին օրինագծերի փաթեթի և հարակից օրենքներում փոփոխությունների քննարկման ժամանակ ասաց արդարադատության փոխնախարար Գրիգոր Մինասյանը։

Այս կապակցությամբ, ինչպես նշեց փոխնախարարը, կառավարությունը մշակել և վերջնական տեսքի է բերել համապատասխան օրենսդրական նախաձեռնությունը։ Օրենսդրական նախաձեռնությունը, ըստ կառավարության ներկայացուցչի հավաստիացման, շոշափում է շատ կարևոր հարցեր, օրինակ՝ Փաստաբանների պալատում ներքին կառավարման սկզբունքների վերանայումը։ «Այսպես, նախատեսվում է ստեղծել Կարգապահական հանձնաժողով, որը թույլ կտա բարձրացնել փաստաբանների հետ կապված կարգապահական գործերի քննարկման արդյունավետությունը։ Միաժամանակ Կարգապահական հանձնաժողովի որոշումները կարող են բողոքարկվել Փաստաբանների պալատի խորհրդում։ Կընդլայնվեն Փաստաբանների պալատի խորհրդի լիազորությունները հատկապես հանրային պաշտպանի գործունեության ոլորտում»,- ասաց Մինասյանը։

Նախատեսվում է նաև վերանայել իրավաբանների պատրաստման և որակավորման բարձրացման կարգը։ Այն անձինք, ովքեր ունեն և՛ բակալավրի, և՛ մագիստրոսի կոչում իրավագիտության ոլորտում, կամ առնվազն 7 տարվա մասնագիտական փորձ ունեցող իրավաբանի դիպլոմ, կկարողանան որակավորման քննություն հանձնել՝ առանց մասնագիտացված ուսումնական հաստատություն (Փաստաբանական դպրոց) հաճախելու:

Կսահմանվեն նաև քաղաքական չեզոքության, ինչպես նաև Փաստաբանների պալատի նախագահի և խորհրդի անդամների զսպվածության պահանջներ՝ վերջիններիս կողմից մասնագիտական պարտականությունների կատարման ընթացքում։

Կվերանայվի նաև Փաստաբանների պալատի մարմինների անդամների ընտրության կարգը։ Դա կարվի ընտրությունների ժամանակ տարբեր կորպորատիվ շահերի առկայության հետ կապված հնարավոր ռիսկերը վերացնելու նպատակով։

Փոխնախարարի խոսքով՝ նախագիծը քննարկվել է իրավաբանների և փաստաբանների հետ։ «Փաստաբանների պալատի հետ ունենք գրեթե 100 տոկոս կոնսենսուս»,- ասաց Մինասյանը։

Համեմատաբար կարճ քննարկումներից հետո կառավարության օրենսդրական նախաձեռնությունը դրական եզրակացություն ստացավ խորհրդարանական հանձնաժողովի կողմից։

Նշենք, որ Հայաստանի իշխանություններին, չնայած ձեռնարկված փորձերին, չհաջողվեց իրենց վերահսկողության տակ առնել Փաստաբանների պալատը և Փաստաբանական դպրոցը։ Պատերազմում կրած պարտությունից հետո վարչապետ Նիկոլ Փաշինյանի հրաժարականը պահանջող կառույցների թվում էր նաև Փաստաբանների պալատը։

News.am