Թեհրանի և Բաքվի հարաբերությունները թյուրըմբռնումից անցել են փոխգործակցության

Թեհրանի և Բաքվի հարաբերությունները թյուրըմբռնումից անցել են փոխգործակցության: Այս մասին հայտարարել է Իրանի արտգործնախարար Հոսեյն Ամիր-Աբդոլլահիանը՝ Թեհրանում իր ադրբեջանցի գործընկեր Ջեյհուն Բայրամովի հետ համատեղ մամուլի ասուլիսում, գրում է Mehr-ը։

Նրա խոսքով, Բայրամովի հետ հանդիպման ընթացքում քննարկվել են մի շարք հարցեր, այդ թվում՝ Թեհրանի ու Բաքվի միջև կապերի ու համագործակցության զարգացումը, երկրների տարածքային ամբողջականության պահպանումը։

Նա հայտնել է, որ քննարկման առարկա է եղել նաև ղարաբաղյան հակամարտության խաղաղ կարգավորումը։ Ամիր-Աբդոլլահիանը հայտարարել է, որ հակամարտության հենց սկզբից Իրանը հայտարարել է ճգնաժամը երկխոսության միջոցով լուծելու իր պատրաստակամության մասին։ «Մենք պատրաստ ենք, որ մնացած հարցերը լուծվեն կողմերի տարածքային ամբողջականությունը և ինքնիշխանությունը հարգելու հիման վրա՝ երկխոսության և դիվանագիտության միջոցով»,- հավելել է նա։

Կարևորելով տարածաշրջանային ձևաչափերի քննարկումը, իրանցի բարձրաստիճան դիվանագետն ասել է, որ անցյալ շաբաթ Անկարա կատարած իր այցի ընթացքում ինքը և Թուրքիայի արտգործնախարարը պայմանավորվել են Թեհրանում անցկացնել Իրանի, Ադրբեջանի և Թուրքիայի եռակողմ հանդիպում՝ արտգործնախարարների մակարդակով։

Ամիր-Աբդոլլահիանը հայտարարել է, որ քննարկվել է նաև Իրան Ադրբեջանի նախագահի այցի նախապատրաստման հարցը։

Անդրադառնալով Իրանի և Ադրբեջանի միջև էներգիայի փոխանակման հարցին՝ Ամիր-Աբդոլլահիանն ասել է, որ երկու կողմերն էլ որոշակի պայմանավորվածություններ են ձեռք բերել, որոնք վերջնական տեսքի կբերվեն Ադրբեջան Իրանի էներգետիկայի նախարարի այցի ընթացքում։

«Մենք ուրախ ենք վերջին ամիսներին տեսնել երկու երկրների միջև ապրանքաշրջանառության ծավալների թռիչքը և հուսով ենք, որ այսօրվա բանակցությունների շնորհիվ մասնավոր և պետական հատվածի առևտրատնտեսական ոլորտը կընդլայնի փոխգործակցությունը»,- շարունակել է Ամիր-Աբդոլլահիանը։ «Անցյալ տարվա գարնանը մենք անցել ենք թյուրըմբռնման փուլը և այժմ գտնվում ենք երկու երկրների շահերին համապատասխան համապարփակ հարաբերությունների աճի զարգացման փուլում։

Բայրամովն իր հերթին հայտնել է, որ իրանական և ադրբեջանական կողմերը պայմանավորվածություններ են ձեռք բերել ավտոմեքենաների և տրակտորների համատեղ արտադրության շուրջ։

Նա նաև հավելել է, որ Ադրբեջանը պատրաստ է մեծացնել Հյուսիս-Հարավ միջանցքի թողունակությունը և կատարել Ռեշտ-Աստարա երկաթուղու կառուցման իր պարտավորությունները՝ հավելելով, որ «հիվանդանոցի և դպրոցի կառուցումը վստահել ենք իրանական ընկերություններին»։

«Մենք պայմանավորվեցինք նաև հետևել անավարտ համատեղ նախագծերի ավարտին և շահագործմանը, ինչպես նաև նախանշել և իրականացնել նոր նախագծեր»,- հավելել է Բայրամովը։

Անդրադառնալով Նախիջևանի հետ Իրանի տարածքով «Զանգեզուրի միացում» նախագծին, որը հայկական անունն է, որը ադրբեջանական իշխանությունները 2020 թվականի պատերազմից հետո տվել են Հայաստանի հետ սահմանային գոտու մի մասին, մոտ ապագայում կսկսվի ադրբեջանցի դիվանագետն ասել է, որ այս տարածքում առաջին կամրջի կառուցումը, և կներկայացվեն անհրաժեշտ համակարգողները։

«Մենք ողջունում ենք տարածաշրջանային ֆորումներում, համագործակցության վերաբերյալ Իրանի կառուցողական դիրքորոշումը, այդ թվում՝ «3+3» մեխանիզմը, և մոտ ապագայում Իրանում կկայանա «3+3» մեխանիզմի ձևաչափով հանդիպում»,- ասել է Բայրամովը։

News.am