Լավրովն ու Բլինկենը մեկնաբանել են Ճապոնիայի նախկին վարչապետի դեմ մահափորձը

ՌԴ արտգործնախարար Սերգեյ Լավրովը ցավում է, որ Ճապոնիայի նախկին վարչապետ Սինձո Աբեի դեմ մահափորձ է իրագործվել։ Տեղեկությունը հայտնում է ՌԻԱ Նովոստին։

«Չգիտեմ` այս մահափորձի հետևում ինչ կա, ես այդ մասին իմացա G20-ի նիստի ժամանակ: Առաջինն էի, որ իմ ելույթը սկսեցի` ափսոսանք հայտնելով ճապոնացի գործընկերոջ դեմ կատարվածի կապակցությամբ», - ասել է նա:

Ըստ The Times of India-ի` մահափորձին անդրադարձել է նաև ԱՄՆ պետքարտուղար Էնթոնի Բլինկենը։

«Շատ, անչափ տխուր պահ է... Մեր մտքերը, մեր աղոթքները նրա հետ են, նրա ընտանիքի, Ճապոնիայի ժողովրդի հետ»,- ասել է Բլինկենը լրագրողներին։

Նրա խոսքով` ԱՄՆ–ն խորապես վշտացած ու մտահոգված է։ Դիվանագետը նշել է, որ չգիտի` ինչ վիճակում է Ճապոնիայի նախկին վարչապետը։

Հիշեցնենք` Ճապոնիայի Նարա քաղաքի փողոցում ելույթի ժամանակ հարձակում է տեղի ունեցել Սինձո Աբեի վրա։ Նախկին ծովագնաց, 41-ամյա Տեցույա Յամագամին երկու անգամ կրակել է հետևից։ Սինձո Աբեն հրազենային վնասվածք է ստացել պարանոցի և կրծքավանդակի շրջանում։

Վիրավորումից անմիջապես հետո նրա գիտակցությունը տեղն է եղել, սակայն կարճ ժամանակ անց վիճակը դարձել է կրիտիկական՝ «սրտի և թոքերի կանգով»: Ներկայումս Սինձո Աբեն գտնվում է Նարայի պրեֆեկտուրայի համալսարանի հիվանդանոցում:

Ճապոնական լրատվամիջոցները հայտնում են, որ կրակողը երեք տարի` մինչև 2005 թվականը ծառայել է երկրի ծովուժում։

Sputnik Արմենիա