ԵՄ-ն բարձր գնաճ և ցածր տնտեսական աճ է կանխատելես

Ուկրաինայում ընթացող պատերազմը մոտ ապագայում կվնասի Եվրամիության տնտեսական վերականգնումը՝ ցածր տնտեսական աճի և բարձր գնաճի միջոցով, հայտնում է PA Media-ն և հավելում, որ եվրագոտու 19 պետություններում, ըստ կանխատեսումների, գնաճը կկազմի միջինում 7,6 տոկոս:

Անցած ամսվա ընթացքում, նախորդ տարվա համեմատ, սպառողական ծախսերն աճել են 8,6 տոկոսով:

«Ուկրաինայի պատերազմը շարունակում է ստվեր գցել Եվրոպայի և դրա տնտեսության վրա»,- ասել է ԵՀ փոխնախագահ Վալդիս Դոմբրովսկիսը։

Գնաճը պայմանավորված է պատերազմի հետևանքով առաջացած էնէերգետիկ ճգնաժամով և էներգակիրների գնաճով: Աճում են մտավախությունները, որ, ձմռանն ընդառաջ պաշարները համալրելու ֆոնին, Ռուսաստանի Դաշնությունը կարող է դադարեցնել գազի մատակարարումները:

ԵՄ-ն ընդունել է, որ ՌԴ նախագահ Վլադիմիր Պուտինը կարող է մի քանի ամսով դուրս բերել եվրոպական տնտեսությունը հավասարակշռությունից և ցանկացած կանխատեսում դարձնել խիստ անորոշ: ԵՄ հայտարարության մեջ նշվում է, որ տնտեսական ակտիվությունն ու գնաճի կանխատեսման ռիսկերը կախված են պատերազմական գործողությունների զարգացումից և, մասնավորապես, գազի մատակարարումների վրա դրա ազդեցությունից:

Բացի վերոնշյալ պայմաններից, տնտեսական վերականգնման վրա բացասաբար է ազդում եվրոյի ցածր ցուցանիշը: Բացի այդ աճել է Covid-19-ով վարակման նոր դեպքերի թիվը, ինչը նույնպես կարող է բացասաբար ազդել տնտեսության վրա:

Այնուամենայնիվ, անկայունությունը կարող է նաև փոխվել, քանի որ ապրանքների և էներգիայի գները կարող են նվազել ավելի արագ տեմպերով, քան կանխատեսվում է:

News.am