Ստամբուլում աշխատանքն է սկսել հացահատիկի հարցով համատեղ համակարգող կենտրոնը

ՈՒԿՐԱԻՆԱՅԻՑ ՀԱՑԱՀԱՏԻԿԻ ԱՐՏԱՀԱՆՈՒՄԸ ԿՍԿՍՎԻ ՄԻ ՔԱՆԻ ՕՐԻՑ

Սև ծովով ուկրաինական հացահատիկի արտահանման մասին ՄԱԿ-ի հետ ստորագրված համաձայնագրի կողմերը հաստատել են դրա կատարման հանձնառությունը՝ հայտարարել է ՄԱԿ-ի գլխավոր քարտուղարի ներկայացուցչի տեղակալ Ֆարհան Հաքը։

Նա տեղեկացրել է, որ Ուկրաինայից հացահատիկի արտահանման շուրջ պայմանավորվածությունների համատեքստում նավերի շարժը կարող է սկսվել մի քանի օրից:

ՌԴ պաշտպանության նախարարությունից էլ հայտնում են, որ Ստամբուլում արդեն աշխատանքն է սկսել համատեղ համակարգող կենտրոնը, որում ներկայացված են Ռուսաստանի, Ուկրաինայի, Թուրքիայի և ՄԱԿ-ի ներկայացուցիչները:

«Ռուս մասնագետների հիմնական նպատակն է հնարավորինս օպերատիվ լուծել բոլոր խնդիրները՝ կատարելու հացահատիկային միջանցքի գործարկման շուրջ ձեռք բերված պայմանավորվածությունները», - ասված է հաղորդագրության մեջ։

ԵՄ ԵՐԿՐՆԵՐԸ ՄԻՆՉԵՎ ՁՄԵՌ ԿՆՎԱԶԵՑՆԵՆ ԳԱԶԻ ՊԱՀԱՆՋԱՐԿԸ

ԵՄ էներգետիկայի նախարարները Բրյուսելում քաղաքական համաձայնություն են ձեռք բերել՝ մինչև ձմեռ նվազեցնելու միության տարածքում գազի պահանջարկը և այդպիսով պատրաստվել ռուսական գազի մատակարարման դադարեցմանը՝ հայտնել է ԵՄ խորհրդում Չեխիայի նախագահությունը։

Ավելի վաղ՝ Գերմանիայի փոխկանցլերը նախազգուշացրել էր երկրում էներգետիկ բարդ իրավիճակի մասին։ Նրա խոսքով՝ գազի պակասի դեպքում մասնավոր տնտեսությունները կամ կարևոր ենթակառուցվածքները, օրինակ՝ հիվանդանոցները, կբախվեն գազամատակարարման ընդհատումների:

Եվրահանձնաժողովի նախագահ Ուրսուլա ֆոն դեր Լայենն էլ զգուշացրել է՝ Եվրոպան պետք է պատրաստ լինի ռուսական գազի մատակարարումից ամբողջությամբ հրաժարվելուն:

«Նույնիսկ այն երկրները, որոնք գազ գրեթե չեն ստանում Ռուսաստանից, չեն կարող խուսափել դրա մատակարարման հնարավոր դադարեցման հետևանքներից: Էներգետիկ ճգնաժամն այսպես թե այնպես կազդի ԵՄ բոլոր անդամների վրա»,- մտահոգություն է հայտնել ֆոն դեր Լայենը։

Հունգարիայի արտաքին գործերի նախարար Պետեր Սիյարտոն, իր հերթին, ընդգծել է՝ գազի սպառումը 15%-ով կրճատելու՝ Եվրահանձնաժողովի ծրագիրը գրեթե անիրատեսական է։

ՀՈՒՍՈՎ ԵՄ՝ ԱՐԵՎՄՈՒՏՔԸ ՍԹԱՓՈՒԹՅՈՒՆ ԿԴՐՍԵՎՈՐԻ. ՊԵՍԿՈՎ

Մոսկվան պատասխան քայլեր կձեռնարկի, եթե ռուսաստանցիներին զրկեն Շենգենյան վիզա ստանալու հնարավորությունից՝ հայտարարել է Կրեմլի խոսնակը։

«Հուսով եմ, Արևմուտքը սթափություն կդրսևորի և նման բան չի անի»,- հավելել է Դմիտրի Պեսկովը։

Նրա խոսքով՝ Կրեմլը հուսով է, որ Ֆինլանդիայում ռուսներին վիզաների տրամադրումը սահմանափակելու նախաձեռնությունը նույնպես կյանքի չի կոչվի, այլապես Մոսկվան բացասաբար կարձագանքի:

Պեսկովի համոզմամբ՝ Ռուսաստանի վրա ճնշում գործադրելու՝ Արևմուտքի սցենարները սպառվում են։

Խոսնակը հայտնել է նաև, որ Մոսկվայում է Գերմանիայի նախկին կանցլեր Գերհարդ Շրյոդերը, սակայն Վլադիմիր Պուտինի հետ նրա հանդիպումը դեռևս օրակարգում չէ:

ԻԻՀ-Ն ՃԿՈՒՆՈՒԹՅՈՒՆ Է ՑՈՒՑԱԲԵՐԵԼ ՄԻՋՈՒԿԱՅԻՆ ԲԱՆԱԿՑՈՒԹՅՈՒՆՈՒՄ

Իրանը ճկունություն է ցուցաբերել միջուկային բանակցություններում, այնպես որ այժմ քաղաքական որոշում կայացնելու հերթն ԱՄՆ-ին է՝ հայտարարել է Իրանի արտգործնախարարության պաշտոնական ներկայացուցիչը:

«Թեհրանը շատ նախաձեռնություններով է հանդես եկել, ուստի եթե ամերիկյան կողմը կառուցողական գործելաոճ ցուցաբերի, կայուն համաձայնության հասնելը հեշտ կլինի»,- ասել է Նասեր Քանանին:

Նա նաև կարծիք է հայտնել, որ Ֆրանսիան ցանկանում է դրական դեր խաղալ բանակցային գործընթացում:

Անդրադառնալով Ուկրաինայում ՌԴ հատուկ ռազմական գործողությանը՝ ԱԳՆ խոսնակը վերահաստատել է Իրանի դիրքորոշումը՝ Թեհրանը դեմ է ռազմական և ուժային լուծումներին և կարծում է, որ վեճերը պետք է կարգավորվեն քաղաքական ճանապարհով:

1Lurer.am