Անձնագրային և վիզաների վարչությունը կաշխատի նաև շաբաթ օրերին

ՀՀ Անձնագրային և վիզաների վարչությունը, ինչպես նաև տարածքային անձնագրային ստորաբաժանումները մինչև ամռան վերջ կաշխատեն նաև շաբաթ օրերին, տեղեկությունը հայտնում է ոստիկանությունը։

Նշվում է, որ պատճառը անձնագրային և վիզաների վարչությունում ու տարածքային անձնագրային ստորաբաժանումներում ներկայումս գոյացող հերթերն են։ Այսպես, անձնագրայինի համար աշխատանքային կլինեն հուլիսի 30-ը, օգոստոսի 6-ը, 13-ը, 20-ը և 27-ը, և կաշխատեն սովորական աշխատանքային ռեժիմով՝ ժամը 9-ից 18-ը։

Միաժամանակ, ոստիկանությունը հիշեցնում է, որ նշված ծառայություններում քաղաքացիների սպասարկումն իրականացվում է առանց ընդմիջման՝ հերթափոխով։

Հիշեցնենք, որ սոցցանցերում բազմաթիվ քաղաքացիներ բողոքում են անձնագրային բաժինների կուտակումներից և մեծ հերթերից։ Քաղաքացիները նշում են, որ առավոտյան ժամը 9-ին կտրոն են վերցնում և տեսնում, որ արդեն 150 անձ կա հերթագրված։ Սակայն ոստիկանությունն էլ հայտնել է, որ գերծանրաբեռնված են աշխատում` այս տարվա հունիսի 1-ից մինչև հուլիսի 19-ը ընկած ժամանակահատվածում նախորդ տարվա համեմատ կատարվել է շուրջ 131 530 գործարք ավելի կամ այդքան անձ ավել է սպասարկվել։

Sputnik Արմենիա