Հայաստանում նոր էներգաբլոկը կկառուցվի Մեծամորում

Հայաստանում նոր էներգաբլոկը կկառուցվի Մեծամորի գործող ԱԷԿ-ի տարածքում։ Sputnik Արմենիայի հարցմանն ի պատասխան այս մասին հայտնել են ՀՀ տարածքային կառավարման և ենթակառուցվածքների նախարարության մամուլի ծառայությունից։

Ավելի վաղ ՏԿԵ նախարար Գնել Սանոսյանը հայտարարել է, որ 2025-2026 թթ. ծրագրվում է սկսել նոր ԱԷԿ-ի կառուցումը։ Մենք նախարարությունից փորձել ենք ճշտել նոր կայանի տեխնիկական պարամետրերի հարցը։

Sputnik Արմենիային նախարարությունից հայտնել են, որ նոր միջուկային էներգաբլոկի կառուցման վերաբերյալ հարցերը քննարկման փուլում են։

«Հայաստանում նոր միջուկային էներգաբլոկի հզորությունը, ռեակտորի մոդելը, տեխնիկական այլ պարամետրեր, ինչպես նաև ֆինանսավորման կառուցվածքը, աղբյուրները, պայմանները և ժամկետները կհստակեցվեն նախնական տեխնիկատնտեսական հիմնավորման մշակումից հետո»,- ասված է նախարարության պատասխանում:

Հունիսին «Հայկական ԱԷԿ» ՓԲԸ–ի մամուլի ծառայությունը հայտնել է, որ Հայաստանի և Ռուսաստանի մասնագետները սկսել են նոր ատոմային էներգաբլոկի նախագծի շուրջ բանակցությունները։ Մասնավորապես քննարկվել է ՋՋԷՌ (Ջրաջրային էներգետիկական ռեակտոր) տիպի ռեակտորի նախնական տեխնիկատնտեսական հիմնավորման կառուցվածքի, ՏՏՀ կատարման տեխնիկական առաջադրանքի և կիրառվելիք նորմատիվ տեխնիկական փաստաթղթերին ու լիցենզավորմանը վերաբերող մոտեցումների քննարկումը:

Նշենք նաև, որ ՀՀ ՏԿԵ նախարար Գնել Սանոսյանը, օգոստոսի 28-31-ը գտնվելով Ռուսաստանի Դաշնությունում, այցելել է նաև Կուրսկի ԱԷԿ-2-ի շինհրապարակ։

Ավելի վաղ դիտարկվում էին ինչպես խոշոր, այնպես էլ միջին հզորությամբ մեկ կամ մի քանի կայանի (300-600 ՄՎտ) կամ նույնիսկ էներգաբլոկների (50-150 ՄՎտ) կառուցման տարբերակ։ Առայժմ ընտրությունը կատարվել է հօգուտ խոշոր կայանի։