Հայ դատը Փելոսիին կոչ է արել անհապաղ դադարեցնել Ադրբեջանին ռազմական օգնության տրամադրումը

Հայ դատի ամերիկյան հանձնախումբը (ANCA) կոչ է արել ԱՄՆ Ներկայացուցիչների պալատի խոսնակ Նենսի Փելոսիին անհապաղ միջոցներ ձեռնարկել, որպեսզի կանգնեցվի ռազմական օգնության տրամադրումն Ադրբեջանին։

Փելոսիի Հայաստան այցի նախօրեին ուղարկված խստաոճ նամակում հանձնախմբի ղեկավար Րաֆֆի Համբարյանը նշել է. «Ադրբեջանին ԱՄՆ ռազմական օգնության տրամադրման դադարեցումը լուրջ մարտահրավեր կնետի մեր պետդեպարտամենտի խորապես սխալ քաղաքականությանը, որը ադրբեջանական ագրեսիայի յուրաքանչյուր ակտին պատասխանում է բռնությունից զերծ մնալու ընդհանուր կոչերով։ Կեղծ հավասարության այս չհաջողված քաղաքականությունը նույնքան կործանարար է, որքան և վտանգավոր, քանի որ հավանություն է տալիս ագրեսորին և կամայականության մատնում զոհերին։ Ավելի լայն իմաստով՝ Ադրբեջանին օգնության դադարեցումը, ի հավելումն հայերի պաշտպանությանն ու խաղաղության աջակցմանը, կամրապնդեր Ամերիկայի հավատարմությունը մարդու իրավունքներին՝ որպես արտաքին քաղաքականության հիմնական սկզբունքի։

Հանդես գալով հայ համայնքի և կոալիցիայի գծով գործնկերների անունից՝ Համբարյանը խոսնակին կոչ է արել ընդունել կոնկրետ օրենսդրական միջոցներ, որպեսզի «ապահովվի առանձին օրենսդրության ընդունումը, 2023թ. ֆինանսական տարվա համար պետական և օտարերկրյա գործողությունների մասին օրինագծի դրույթները, Պետական պաշտպանության մասին օրենքը կամ այլ օրենսդրական միջոցներ, չեղարկվի նախագահի իրավասությունը ԱՄՆ-ի կողմից Ադրբեջանին հատկացվող օգնության 907 օրենքի սահմանափակումների բաժնից հրաժարվելու մասին և/ կամ օրենսդրորեն արգելվի ԱՄՆ Կոնգրեսի կողմից ցանկացած միջոցի հատկացումն Ադրբեջանի կառավարությանը»։

Մինչ այդ Politico պարբերականը տեղեկացրել էր, որ Փելոսին և կոնգրեսական Ջեքի Սփեյերը (Կալիֆոռնիայի նահանգ) կմեկնեն Երևան սեպտեմբերի 17-ին։ Այցը տեղի կունենա ադրբեջանական ուժերի կողմից ականանանետերից և անօդաչու թռչող սարքերից Ադրբեջանի հետ Հայաստանի արևելյան սահմանին գտնվող հայկական Սոթքի, Վարդենիսի, Գորիսի, Կապանի, Արտանիշի, Ջերմուկի և Իշխանասարի հրետակոծություններից մի քանի օր հետո։

News.am