ՀՀ ԱԱԾ- ն քրդերին չի հանձնել Թուրքիային. ծառայությունը անդրադարձել է արտահանձնման լուրերին

ՀՀ Ազգային անվտանգության ծառայությունն արձագանքել է սոցիալական ցանցերում տարածվող տեղեկատվությանը` ազգությամբ քուրդ Աթիլլա Չիչեքին և Հուսեյին Յըլդրըմին Թուրքիային արտահանձնելու վերաբերյալ։

Հրապարակված հաղորդագրության մեջ մասնավորապես նշվում է. «Քրեական վարույթների շրջանակներում դատապարտված անձանց հանձնման գործընթացը դուրս է ծառայության լիազորությունների շրջանակից։ Ազգային անվտանգության ծառայությունը հորդորում է զերծ մնալ պետական կառույցների հեղինակությունն արատավորող, երկրի արտաքին անվտանգությունը խաթարող ապատեղեկատվություն տարածելու անթույլատրելի գործելաոճից և զգուշացնում է, որ ծառայությունն իր լիազորությունների շրջանակում ստուգողական գործողությունների միջոցով հետամուտ է լինելու պարզելու ստահոդ լուրեր տարածողների իրական շարժառիթները և քողարկված մղումները»։

ԱԱԾ–ն նաև նշում է, որ ծառայության հասցեին հնչող մեղադրանքներն ու քննադատություններն «անհիմն ու մերկապարանոց» են, չեն համապատասխանում իրականությանը և չունեն որևէ իրավական հիմք։ Ըստ ԱԱԾ–ի` նպատակը ԱԱԾ–ին թիրախավորելն է։

Հիշեցնենք` սոցիալական կայքերում առկա տեղեկատվության համաձայն` Հայաստանը Թուրքիային է արտահանձնել ազգությամբ քուրդ Աթիլլա Չիչեքին և Հուսեյին Յըլդրըմին։

Սոցիալական կայքերում տեղեկատվությունը տարածողները կատարվածի համար մեղադրում են ՀՀ ԱԱԾ–ին ու իշխանությանը` Թուրքիայի հետ քրդերի հարցում համաձայնության գալու մեջ։

Նշենք, որ Աթիլլա Չիչեքն ու Հուսեյին Յըլդրըմը Հայաստանում են 2021թ–ի օգոստոսի 16-ից։ Ըստ նրանց նկատմամբ հրուցված քրեական գործի` այդ օրը նրանք Սյունիքի մարզում հատել են ՀՀ պետական սահմանը՝ Իրանի Իսլամական Հանրապետությունից Արաքս գետով մուտք գործելով Հայաստանի Հանրապետություն։

Հուսեին Յըլդըրըմին և Աթիլլա Չիչեքին մեղադրանք է առաջադրվել պետական սահմանը ապօրինի հատելու, ինչպես նաև զենք–զինամթերքի մաքսանենգության համար (2 ինքնաձիգ, 1 ատրճանակ, 318 հատ փամփուշտ և 4 հատ նռնակ): 2021թ–ի հոկտեմբերին մեկնարկած դատավարությունն ավարտվել է 2022թ–ի ապրիլի 27-ին` Վճռաբեկ դատարանի որոշմամբ։

Օրինական ուժ մեջ մտած դատավճռով Հուսեին Յըլդըրըմը դատապարտվել էր 5 տարվա ազատազրկման և 3 միլիոն իրանական ռիալի բռնագրավման, Աթիլլա Չիչեքը՝ 5 տարվա ազատազրկման ու 5 700 ԱՄՆ դոլարի բռնագրավման: Սակայն պատիժը երկու ամբաստանյալների նկատմամբ էլ որոշվել էր պայմանական չկիրառել` սահմանելով 3 տարվա փորձաշրջան, որի արդյունքում Յըլդըրըմն ու Չիչեքն ազատ էին արձակվել դատարանի դահլիճից։

Աթիլլա Չիչեքի և Հուսեյին Յըլդրըմի ձերբակալության մասին թուրքական Anadolu գործակալությունը հայտնել էր սեպտեմբերի 23-ին` նշելով, որ վերջինները Քրդական աշխատավորական կուսակցության անդամներ են։

Նրանց ձերբակալության մեջ Հայաստանի մասնակցության մասին հաղորդագրության մեջ ոչինչ չի ասվում։

Sputnik Արմենիա