Փաշինյանն ու Էրդողանը կարևորել են ուղիղ շփումները. մանրամասներ

ՀՀ վարչապետ Նիկոլ Փաշինյանը և Թուրքիայի նախագահ Ռեջեփ Թայիփ Էրդողանը համատեղ հանդիպման ժամանակ քննարկել են Հայաստան-Թուրքիա հարաբերությունների կարգավորման գործընթացն ու այդ ուղղությամբ հետագա հնարավոր քայլերը, տեղեկությունը հայտնում է վարչապետի աշխատակազմը։

«Շեշտվել է երկու երկրների հատուկ ներկայացուցիչների քննարկումների արդյունքում ձեռք բերված պայմանավորվածությունների շուտափույթ իրականացման անհրաժեշտությունը: Մասնավորապես, խոսքը վերաբերում է երրորդ երկրների քաղաքացիների համար ցամաքային սահմանի բացմանը, Հայաստան-Թուրքիա ուղիղ օդային բեռնափոխադրումների իրականացմանը»,–ասված է հաղորդագրության մեջ։

Հայաստան-Թուրքիա կարգավորման համատեքստում երկուստեք կարևորվել են ուղիղ շփումներն ու բարձր մակարդակի հանդիպումները:

Կողմերը մտքեր են փոխանակել նաև տարածաշրջանային գործընթացների շուրջ:

Հավելենք, որ Պրահայում անցկացվել է Եվրոպական քաղաքական համայնքի գագաթնաժողովը։

Էրդողանը հայտարարել է, որ հավատում է ՀՀ–ի հետ հարաբերությունների լիակատար կարգավորմանը

Նշենք, որ մինչ Էրդողանի հետ հանդիպումը կայացել էր քառակողմ հանդիպում Հայաստանի վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի մասնակցությամբ, ինչպես նաև Փաշինյան–Էրդողան–Ալիև ոչ ֆորմալ հանդիպումը։

Հայաստանի վարչապետը հանդիպումներ է ունեցել նաև Հունաստանի ու Գերմանիայի ղեկավարների հետ։

Հիշեցնենք, որ վերջին անգամ Հայաստանի և Թուրքիայի ղեկավարները հանդիպել էին 2009 թվականին, երբ Թուրքիայի Բուրսա քաղաքում ազգային հավաքականների ֆուտբոլային հանդիպման ժամանակ հանդիպեցին այն ժամանակվա նախագահներ Սերժ Սարգսյանը և Աբդուլլահ Գյուլը:

Sputnik Արմենիա