ԵՐԿԱՐԱՏԵՎ ԱԶԴԵՑՈՒԹՅԱՆ ԾՐԱԳԻՐ՝ ՆՈՐ ՏԵԽՆՈԼՈԳԻԱՆԵՐԻ ԿԻՐԱՌՄԱՄԲ

Վիվա-ՄՏՍ-ը և Վայրի բնության և մշակութային արժեքների պահպանման հիմնադրամը (FPWC) շարունակում են նորագույն տեխնոլոգիաները հասցնել մարզեր: Մայրաքաղաքից կտրված՝ հատկապես սահմանամերձ գյուղերում, փողոցային լուսավորության արդի համակարգերի ներդրումը ոչ միայն պահանջված է, այլև՝ անհրաժեշտ: Որպես տեղեկատվական ու հեռահաղորդակցային ընկերություն, Վիվա-ՄՏՍ-ն աջակցում է համայնքներին՝ տեխնոլոգիական ու ծախսարդյունավետ ենթակառուցվածքային լուծումներ ներդնելով, բնապահպանական, էներգախնայող ժամանակակից տեխնոլոգիաների կիրառումով, որոնք թույլ են տալիս սպառել 80%-ով պակաս էլեկտրաէներգիա՝ ապահովելով ավելի բարձր լուսատվություն:

Գեղարքունիքի մարզի Վանեվան գյուղի բնակիչները երեկոյան ժամերին մթության մեջ խարխափելու ամենադժվար օրերից մեկը համարում են ընթացիկ տարվա սեպտեմբերի 12-ի՝ լույս 13-ի գիշերը: Պատերազմական իրավիճակ հիշեցնող օրը գյուղից մանկահասակ երեխաներին և կանանց տեղափոխելու համար փողոցներն առավել մռայլ ու վտանգավոր են համարվել: Հեռախոսների կամ տներից երևացող լույսերը բավարար չեն եղել ոտքերի առաջ տեսնելու և անհրաժեշտ տարհանումը կազմակերպելու համար: Ընթացիկ տարվա ծրագրի մեկնարկը տրվել է այստեղ՝ Վանեվանում: Տեղորոշվել են էլեկտրասյուների տեղակայման հնարավոր հատվածները։

«Հեռավոր գյուղերում փողոցային լուսավորության առկայությունը ոչ միայն քաղաքակիրթ կեցության բաղադրիչ է, այլև անվտանգության երաշխիք: Լինում են իրավիճակներ, երբ մարդիկ խուճապի են մատնվում: Մինչդեռ լուսավորություն ունենալու դեպքում նման բան չի լինի. մարդիկ կհասկանան, թե ուր են գնում և թե ով է իրենց ընդառաջ գալիս մյուս կողմից»,- ասել է Վանեվանի վարչական ղեկավար Իգոր Հարությունյանը:

Փողոցային լուսավորություն երբևիցե չունեցած գյուղն ընթացիկ տարում մասամբ կլուսավորվի: Բնապահպանական, էներգախնայող և արդի տեխնոլոգիաների կիրառումը թույլ կտա ունենալ լուսավորված գյուղ և տնտեսվող միջոցներ:

Նախատեսում է տեղադրել 40 LED լուսարձակներից բաղկացած արտաքին լուսավորության համակարգ, որով հիմնականում լուսավորվելու է գյուղի կենտրոնական փողոցը և ևս երեք առավել բանուկ երկրորդական փողոց։

2022 թվականին, Հայաստանի տարբեր համայնքներում ենթակառուցվածքների զարգացման համար, Վիվա-ՄՏՍ-ը ներդրել է ավելի քան 120 մլն. դրամ:

Ի տարբերություն սովորական լամպերի՝ բնապահպանական և էներգաարդյունավետ լուսադիոդային (LED) լուսարձակները սպառում են 80%-ով պակաս էլեկտրաէներգիա՝ միաժամանակ ապահովելով ավելի բարձր լուսատվություն։

Ընդհանուր առմամբ, լուսավորվելու է 1400 մետր ճանապարհահատված։

Վիվա-ՄՏՍ-ը (ՄՏՍ Հայաստան ՓԲԸ) Հայաստանի շարժական կապի առաջատար օպերատորն է, որն ունի ամենաընդարձակ ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը՝ հիմնադրման օրվանից` 2005թ. հուլիսի 1-ից, Վիվա-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: Վիվա-ՄՏՍ-ը նորարարությունների առաջատար է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: Վիվա-ՄՏՍ-ը գործունեության մեջ առաջնորդվում է ISO 26000` Սոցիալական պատասխանատվության, ISO/IEC 27001:2013` Տեղեկատվական անվտանգության կառավարման համակարգի, ինչպես նաև ISO 37001` հակակոռուպցիոն և կաշառակերության կանխարգելմանն ուղղված միջազգային ստանդարտներով: Հավելյալ տեղեկություններ ստանալու համար այցելեք www.mts.am։

«Մոբիլնիյե Տելեսիստեմի» ՀԲԸ-ն (ՄՏՍ) Ռուսաստանում և ԱՊՀ երկրներում հեռահաղորդակցության խոշորագույն օպերատոր է: Դուստր ձեռնարկությունների հետ միասին կազմակերպությունը սպասարկում է շուրջ 88 միլիոն բաժանորդի Ռուսաստանում, Հայաստանում և Բելառուսում: 2000թ-ի հունիսից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ: Հավելյալ տեղեկություններ ստանալու համար այցելեք www.mtsgsm.com։

«Էկոգյուղերի ցանց» ծրագրի մասին

էկոգյուղերի ցանցը ներառում է գյուղեր Հայաստանի ամբողջ տարածքից, որտեղ տեղական մասնակցային գործընթացների միջոցով սոցիալական, մշակութային, տնտեսական և բնական միջավայրի վերականգնմանն ուղղված ծրագրեր են իրականացվում:

Էկոգյուղերի հայեցակարգի hիմքում կայունության չորս՝ բնապահպանական, տնտեսական, մշակութային և սոցիալական ուղղությունների՝ մասնակցային և համընդգրկուն նախագծման միջոցով ինտերգրումն է: Ծրագիրը Վայրի բնության և մշակութային արժեքների պահպանման հիմնադրամի (FPWC), ՎիվաՍել-ՄՏՍ-ի և Էկոգյուղերի համաշխարհային ցանցի երկարաժամկետ համագործակցության նոր ձևաչափ է` բնապահպանության և բնական ռեսուրսների կայուն օգտագործման բնագավառում:

FPWC-ի մասին

Վայրի բնության և մշակութային արժեքների պահպանման հիմնադրամը (FPWC) գործում է 2002թ-ից: FPWC-ին Բնության պահպանության միջազգային միավորման (IUCN) անդամ է։

Հայաստանի բնական բացառիկ ժառանգության և կենսաբազմազանության պահպանության, բնապահպանական խնդիրների և բնության պահպանության կարևորության մասին հանրային իրազեկումը մեր առաքելությունն է։ Մենք նպատակ ունենք մարդ-վայրի բնություն հակամարտության և դրա հետևանքների նվազեցմամբ կրճատել կենդանական և բուսական աշխարհի վտանգված տեսակների անհետացման ռիսկերը։

Կենսաբազմազանության պահպանումը, բնապահպանական կրթությունը, համայնքային զարգացումը և հանրային իրազեկումը մեր գործունեության առանցքում են։