ԵԽԽՎ-ում Ֆրանսիայի պատվիրակ․ Ադրբեջանը պետք է իր զորքերը դուրս բերի Հայաստանի տարածքից

Հայաստանի տարածքային ամբողջականությունը պետք է հարգվի, և Ադրբեջանը պետք է իր զորքերը դուրս բերի հայկական տարածքից՝ համաձայն 2020 թվականի նոյեմբերի 10-ի զինադադարի պայմանագրի։ Այս մասին հայտարարել է ֆրանսիացի պատվիրակ Ժակ Լը Նեյը՝ ելույթ ունենալով ԵԽԽՎ-ում աշնանային նստաշրջանի քննարկումներում։

Նա դատապարտել է ուժի կիրառումը, որն անընդունելի է։ «Այս բախումներն ամենախոշորն են 2020 թվականի պատերազմի ավարտից հետո։ Մենք պետք է հիշեցնենք մի շարք հիմնարար սկզբունքների մասին։ Առաջին հերթին, անհրաժեշտ է հարգել Հայաստանի տարածքային ամբողջականությունը, իսկ 2020 թվականի նոյեմբերի 10-ի հրադադարի համաձայնագրով Ադրբեջանը պետք է զորքերը դուրս բերի հայկական տարածքից»,-ասել է նա։

Քաղաքական գործիչը կոչ է արել հետաքննել և պատասխանատվության ենթարկել բոլոր մեղավորներին՝ կապված տեսանյութի հետ, որտեղ ադրբեջանցի զինվորները խոշտանգում և սպանում են հայ զինծառայողներին։

«Կողմերին կոչ եմ անում հնարավորինս շուտ կնքել խաղաղության համաձայնագիր,  Եվրախորհուրդը պետք է ամբողջությամբ խաղա քննարկումների համաեվրոպական հարթակի դերը և խթանի քաղաքական երկխոսությունը։ Միջազգային հանրությունը չի կարող անտարբեր մնալ տարածաշրջանում տիրող իրավիճակի նկատմամբ։ Եվրամիությունը, Միացյալ Նահանգները, ինչպես նաև Ռուսաստանը և Թուրքիան պետք է միասին աշխատեն այս հակամարտությունը կարգավորելու համար, սակայն Ուկրաինայի պատերազմի լույսի ներքո միջազգային հանրությունը չի կարողանա համախմբվել: Ուկրաինայի պատերազմը հետևանքներ ունի Հայաստանի և Ադրբեջանի համար։ Ի վերջո, Ռուսաստանն ավելի քան երբևէ մեկուսացված է և չի պատրաստվում նպաստել քննարկումներին։ Նա ինքնին ճահճացած է Ուկրաինայում, և, հետևաբար, մենք պետք է բարձրացնենք իրազեկվածությունը՝ ի շահ տարածաշրջանի խաղաղության»,-հավելել է ֆրանսիացի պատվիրակը։

News.am