Կովաչև․ Հարձակումը եղել է Ադրբեջանի կողմից, Մարսից չեն ներխուժել Հայաստան

Եվրոպական խորհրդարանի Հայաստանի հարցերով զեկուցող Անդրեյ Կովաչևը և ՀՀ ԱԺ նախագահ Ալեն Սիմոնյանը հանդիպմանը խոսել են ՀՀ ինքնիշխան տարածքի դեմ ադրբեջանական զինված ուժերի սանձազերծած լայնածավալ ագրեսիայի մասին։ Տեղեկությունը հայտնում է ՀՀ ԱԺ աշխատակազմի մամուլի ծառայությունը։

Կողմերն արձանագրել են, որ հակամարտության կարգավորման հարցը բանակցությունների սեղանից կրկին փորձ է արվել տեղափոխել ռազմական դաշտ՝ վերածելով լայնածավալ ագրեսիայի Հայաստանի դեմ: Անդրեյ Կովաչևը նկատել է, որ սա այն դեպքը չէ, երբ հավասարապես պետք է կողմերին կոչ անել կրակի դադարեցման վերաբերյալ:

«Հարձակումը եղել է Ադրբեջանի կողմից, բնականաբար, Մարս մոլորակից չեն ներխուժել Հայաստանի տարածք»,- հավելել է նա:

Ալեն Սիմոնյանն էլ նշել է, որ Հայաստանը վաղուց և բազմիցս զգուշացրել է Ադրբեջանի կողմից նոր պատերազմի մասին։ Նա ընդգծել է՝ միջազգային գործընկերներից ՀՀ-ն ակնկալում է Ադրբեջանի գործողությունները դատապարտող հասցեական հայտարարություններ։ Սիմոնյանը շեշտել է, որ բարձր է գնահատում Եվրամիության շարունակական միջնորդական ջանքերը, ԵՄ դիտորդական առաքելության ժամանումը հայ-ադրբեջանական սահման:

ԱԺ նախագահը երախտագիտություն է հայտնել Եվրոպական խորհրդարանին՝ հօգուտ Հայաստանի համապատասխան բանաձևեր և զեկույցներ ընդունելու համար:

Հանդիպմանը կողմերը քննարկեն են նաև Ադրբեջանի բարձրագույն ղեկավարության կողմից հետևողականորեն հնչող հայատյաց հռետորաբանությանը, հայկական մշակութային և կրոնական ժառանգության ոչնչացմանը, ռազմագերիների ու քաղաքացիական անձանց հայրենադարձմանն առնչվող հարցեր:

Sputnik Արմենիա