Դատախազությունն ուսումնասիրություն է սկսել «Թորոսյանի ձկնաբուծական բիզնեսը» հոդվածի հիմքով

ՀՀ գլխավոր դատախազությունն ուսումնասիրություն է սկսել «Հետք»-ում հրապարակված հոդվածի վերաբերյալ, ըստ որի առողջապահության նախկին նախարար, ԱԺ «Քաղաքացիական պայմանագիր» խմբակցության պատգամավոր Արսեն Թորոսյանի ընտանիքը ձկնաբուծական բիզնես է սկսել Արագածոտնի մարզի Ղազարավան գյուղում։

«Գլխավոր դատախազությունն ուսումնասիրություն է սկսել «Հետք»-ում հրապարակված հոդվածի վերաբերյալ», - Sputnik Արմենիայի հետ զրույցում ասաց ՀՀ գլխավոր դատախազի խորհրդական Լուսինե Մարտիրոսյանը։

Հիշեցնենք՝ «Հետքը» գրել էր, որ «Ֆիշ Ֆարմ Մենեջմենթ» ՍՊԸ-ի 80% բաժնեմասը պատկանում է Արսեն Թորոսյանի հորը՝ Գևորգ Թորոսյանին: Իսկ 20%-ի սեփականատերը Արագածոտնի մարզպետի խորհրդական Ռազմիկ Թադևոսյանի հայրն է՝ Սարգիս Թադևոսյանը:

Կադաստրի կոմիտեի տվյալների միասնական էլեկտրոնային բազայից ստացված տեղեկատվության համաձայն` Արագածոտնի Ղազարավան գյուղում գտնվող ՍՊԸ–ի հողի սեփականատերը ընկերությունում 20% բաժնեմաս ունեցող Սարգիս Թադևոսյանն է, ումից էլ «Ֆիշ Ֆարմ Մենեջմենթ» ՍՊԸ-ն վարձակալել է 217 քմ արտադրական նշանակության հողատարածք և 9 ջրավազան:

Արսեն Թորոսյանը, հոր՝ Գևորգ Թորոսյանի և Սարգիս Թադևոսյանի՝ «Ֆիշ Ֆարմ Մենեջմենթ» ՍՊԸ-ում բաժնետեր դառնալու հաջորդ օրը՝ 2021թ. հոկտեմբերի 20-ին, երկու միավոր հողատարածք է գնել Արագածոտնի մարզի Փարպի գյուղում:

2021թ.ին Արսեն Թորոսյանը Փարպիում գնած հողատարածքներից բացի, երկու միավոր հողատարածք էլ ձեռք բերել Կոտայքի մարզի Նոր Հաճն համայնքի Քարաշամբ գյուղում:

Բացի այդ, Թորոսյանն ու կինը հողատարածք են գնել Ծաղկաձորում։

Թորոսյանն արձագանքել է հոդվածին՝ նշելով, որ իր մասին հրապարակման մեջ առկա տեղեկատվության մեծ մասը հրապարակված է իր և կնոջ հայտարարագրերում, մնացածը կհրապարակվի 2022 թվականին։ Նա նաև նշել է, որ ինքը և իր կինը գնել են այն ամենը, ինչ նշված է հոդվածում օրինական ճանապարհով վաստակած գումարով։ Միաժամանակ նա հայտարարել է, որ ՀՀ օրենսդրությամբ պաշտոնատար անձանց ընտանիքի անդամների կողմից ձեռնարկատիրական գործունեության արգելք չկա, այսինքն՝ իր հայրը օրենքով կարող է ձեռնարկատեր լինել։