Սիմոնյան․ Բաքուն տորբեդահարում է խաղաղության հաստատման ուղղությամբ բոլոր ջանքերը

Բաքուն իր հռետորաբանությամբ և ռազմական գործողություններով տորբեդահարում է Հարավային Կովկասի տարածաշրջանում երկարատև խաղաղության հաստատման ուղղությամբ Հայաստանի և միջազգային հանրության ջանքերը։ ԱՊՀ Միջխորհրդարանական վեհաժողովի 54-րդ լիագումար նիստում իր ելույթի ժամանակ հայտարարել է ՀՀ Ազգային ժողովի նախագահ Ալեն Սիմոնյանը։

ԱԺ նախագահը հիշեցրել է Ադրբեջանի կողմից այս տարվա սեպտեմբերի 13-ին իրականացրած ագրեսիան` ասելով, որ, ցավոք, միջազգային և տարածաշրջանային կառույցների կողմից միանշանակ և հասցեական արձագանքի բացակայությունն Ադրբեջանին թույլ տվեց շարունակել իր ագրեսիվ քաղաքականությունը։

«Սեպտեմբերյան ագրեսիայի ժամանակ ՀՀ ինքնիշխան տարածքում հայ անզեն ռազմագերիների գնդակահարման, գերեվարված հայ զինծառայողների մասնատման սարսափելի դեպքեր են արձանագրվել։ Ադրբեջանական սոցցանցերում տարածվել են հայ կին զինծառայողների մարմինների նկատմամբ խոշտանգումների լուսանկարներ, տեսանյութեր։ Կարծում եմ` անհրաժեշտ է պատշաճ միջազգային հետաքննություն անցկացնել, իսկ այդ ոճրագործությունները կատարած անձինք պետք է պատասխանատվության ենթարկվեն»,–ասել է Սիմոնյանը։

Նրա խոսքով` Հայաստանը հավատարիմ է երկարաժամկետ և արդար խաղաղության հաստատմանը, սակայն հարկադրանքի քաղաքականությունն անընդունելի է։ Սիմոնյանը շեշտել է` արդյունավետ բանակցային գործընթացի համար անհրաժեշտ են կոնկրետ գործողություններ, այն է՝ պետք է ՀՀ ինքնիշխան տարածքից ադրբեջանական զորքերը դուրս գան, հրադադարի ռեժիմը պահպանվի և բոլոր հայ ռազմագերիներն անհապաղ ազատ արձակվեն։

Նա հավելել է, որ իրավիճակի առնչությամբ ՀՀ-ն դիմել է ՀԱՊԿ–ին, և անվտանգության խորհրդի արտահերթ նիստի ժամանակ որոշվել է Հայաստան առաքելություն ուղարկել` տեղում իրավիճակի մշտադիտարկման համար: Սիմոնյանը նշել է` առաքելությունն արդեն ավարտել է իր աշխատանքը և ներկայացրել եզրակացություններ, առաջարկություններ։

ԱԺ նախագահն ասել է նաև, որ ՀՀ-ն հատուկ կարևորություն է տալիս սահմանային իրավիճակի մոնիթորինգի և վերահսկման միջազգային մեխանիզմների ներդրմանը։ Նա հիշեցրել է, որ հայ-ադրբեջանական սահման ուղարկվել են ԵԱՀԿ դիտորդներ։

Սիմոնյանն անդրադարձել է նաև Ադրբեջանի հետ սահմանի դելիմիտացիայի և տրանսպորտային հաղորդակցությունների ապաշրջափակմանը` ասելով, որ ՀՀ–ն սկզբունքային դիրքորոշում ունի այս հարցերում և բազմիցս հայտարարել է, որ ՀՀ–ն ձգտում է հարաբերություններ հաստատել տարածաշրջանում գործընկերության հիման վրա։ Նա իր խոսքն ամփոփել է` ասելով, որ սահմանազատման և հետագա սահմանագծման աշխատանքները պետք է հիմնարար փաստաթղթերի հիման վրա արվեն։

Sputnik Արմենիա