Պետական ծառայողների աշխատավարձերը կբարձրացվեն, իսկ պարգևավճարները՝ կկրճատվեն

Հայաստանում պետական ծառայողների աշխատավարձերը կբարձրացվեն, իսկ պարգևավճարները՝ կկրճատվեն. Այս մասին հոկտեմբերի 31-ին Ազգային ժողովում մշտական խորհրդարանական հանձնաժողովների համատեղ նիստում 2023 թվականի պետական բյուջեի նախագծի քննարկման ժամանակ ասաց ֆինանսների նախարար Տիգրան Խաչատրյանը ։

Ֆինանսների նախարարության ղեկավարի խոսքով՝ բոլոր գերատեսչություններում պարգևավճարների ֆոնդը մինչև 2019 թվականը կազմել է աշխատավարձի ֆոնդի մոտ 10 տոկոսը։ Ընդ որում, 2019 թվականին այս 10 %-ին ավելացրել են ևս 20 տոկոս։ Այսպիսով, կառավարությունը ցանկանում է պարգևավճարների ֆոնդը 30 տոկոսից իջեցնել 16 տոկոսի։ «Թե ինչ սկզբունքով են բաշխվելու պարգևները, կորոշվի մինչև ընթացիկ տարվա վերջը»,- ասաց Խաչատրյանը։

Սակայն, ինչպես նշեց կառավարության ներկայացուցիչը, այս հարցի վերաբերյալ վերջնական որոշում առայժմ չկա։ Հայտնի է միայն, որ բազային դրույքաչափը, որով հաշվարկվում են պաշտոնյաների աշխատավարձերը՝ կախված պաշտոնից և ստաժից, 66 140-ից կբարձրացվի մինչև 82 000 դրամ։ Աշխատավարձերի բարձրացմանը կուղղվի նաև պարգևավճարների ֆոնդի մի մասը։

«Ընդհանուր առմամբ 2023 թվականին պետական ծառայողների աշխատավարձերի ֆոնդը կավելացվի 21 մլրդ դրամով։ Այսինքն՝ 7-8 տոկոսով»,- պարզաբանեց նախարարը։

News.am