Վիտալի Կլիչկոն նախազգուշացրել է Կիևում «ապոկալիպսիսի» մասին

Կիևի քաղաքապետ Վիտալի Կլիչկոն նախազգուշացրել է այս ձմռանը Ուկրաինայի մայրաքաղաքում «ապոկալիպսիսի» մասին, եթե ենթակառուցվածքներին ռուսական օդային հարվածները շարունակվեն, սակայն պնդել է, որ այժմ կարիք չկա բնակիչներին տարհանելու, թեև նրանք պետք է պատրաստ լինեն դրան:

«Կիևը կարող է մնալ առանց լույսի, ջրի և ջերմության։ Ապոկալիպսիս կարող է տեղի ունենալ, ինչպես հոլիվուդյան ֆիլմերում, երբ ցածր ջերմաստիճանի պատճառով անհնար է տներում ապրել»,- ասել է Կլիչկոն Reuters-ին տված հարցազրույցում։ «Բայց մենք պայքարում ենք և անում ենք հնարավոր ամեն ինչ, որպեսզի դա տեղի չունենա»,- շարունակել է նախկին բռնցքամարտիկը:

Այդուհանդերձ պատկերը մռայլ է՝ մայրաքաղաքում բացակայում են ջեռուցվող ապաստարանները, որոնք կտեղավորեն բոլոր 3,6 միլիոն բնակիչներին ամբողջական հոսանքազրկման դեպքում, և մարդիկ պետք է պատրաստ լինեն տարհանման, եթե իրավիճակը վատթարանա, ասել է Կլիչկոն: «Այս պահին մենք պատրաստել ենք մոտ 500 ինքնավար ջեռուցման հանգույց, սակայն 3 միլիոն բնակչություն ունեցող քաղաքի համար 500 միավորը ոչինչ է»,- նշել է նա։

Կլիչկոն ուրվագծել է հնարավոր սցենարներից մեկը, երբ քաղաքը կարող է մնալ առանց կենտրոնացված ջեռուցման մինչև գարուն, երբ ջերմաստիճանը կարող է իջնել մինչև -15 աստիճան Ցելսիուս:

«Եթե դեռ էլեկտրաէներգիա չմատակարարվի, և օդի ջերմաստիճանը ցածր մնա, ցավոք, մենք ստիպված կլինենք ջուրը հեռացնել ջեռուցման համակարգից։ Հակառակ դեպքում ջուրը կարող է սառչել և պայթեցնել ջրամատակարարման ողջ ցանցը, և շենքերն այդ ժամանակ լիովին ոչ պիտանի կլինեն հետագա օգտագործման համար»։

Կլիչկոն կոչ է արել բնակիչներին սննդի և ջրի վթարային պաշարներներ պատրաստել, ինչպես նաև պատրաստ հագուստ ու փաստաթղթեր ունենալ՝ էլեկտրաէներգիայի անջատման դեպքում արագ հեռանալու համար։

Սակայն ներկայումս տարհանման կարիք չկա, ասել է նա, քանի որ քաղաքում էլեկտրաէներգիայի ընդամենը 20 տոկոս դեֆիցիտ կա, իսկ պայմանները մնում են կայուն։

News.am