Մարտակերտից Քարվաճառ ճանապարհը դեկտեմբերի 12-ից փակ է ադրբեջանցիների համար (ՏԵՍԱՆՅՈՒԹ)

Մարտակերտի շրջանում շրջափակման 8-րդ օրը կյանքն ընթանում է բնականոն հունով: Այս մասին նշել է Մարտակերտի շրջանային վարչակազմի ղեկավար Արսեն Ավանեսյանը:

Նա հերքել է լուրերը, թե շաբաթ և կիրակի իրենք փակել են ադրբեջանական ավտոշարասյան ճանապարհը. «Այդ ճանապարհը ադրբեջանցիների համար փակ է դեկտեմբերի 12-ից և չի գործելու, մինչև չբացվի Արցախի կյանքի միակ ճանապարհը: Շրջանում որոշ բաների պակաս կա, բայց ընդհանուր առմամբ, նորմալ է, խուճապի մատնվելու բան չկա, հանգիստ է: Կարգի համաձայն օպերատիվ շտաբի հետ քննարկման արդյունքում, այն ամենը, ինչ պետք է շրջանի կարիքները բավարարելու համար, հրատապ բավարարվում է»,-ասաց նա:

Ասկերանի շրջանում ևս առանձին ապրանքատեսակների պակաս չկա, սակայն պահեստներում առկա պաշարները նվազում են: Ասկերանի շրջանային վարչակազմի ղեկավար Համլետ Ապրեսյանը նշել է, որ իրենց շրջանից կա 15 ընտանիք, որ գտնվում է Գորիսում. «Կապը պահում ենք իրենց հետ: Մի երեխա կա, որ Եվրատեսիլին է մասնակցել ու հիմա առանց ծնողի է Հայաստանում: Մնացածը ծնողների հետ են,-ասել է նա:

News.am