Հաղորդակցությունների ապաշրջափակման շուրջ համաձայնության իրականացումը ձգձգելու պատճառ չկա

Հարավային Կովկասում հաղորդակցությունների ապաշրջափակման շուրջ համաձայնության իրականացումը ձգձգելու պատճառ չկա։ Այս մասին հայտարարել է ՌԴ արտգործնախարար Սերգեյ Լավրովը՝ Մոսկվայում իր ադրբեջանցի գործընկեր Ջեյհուն Բայրամովի հետ հանդիպումից հետո։

«Ինչպես ասացի, մենք նախատեսում էինք հանդիպել երեքով։ Նախատեսվում էր քննարկում իմ երկու գործընկերների (Հայաստանի և Ադրբեջանի-խմբ.) միջև խաղաղության պայմանագրի խնդրի շուրջ։ Մենք պատրաստ էինք աջակցել այդ բանավեճին։ Այնուամենայնիվ, այսօր մենք անդրադարձանք խաղաղության պայմանագրի թեմային։ Կարծում ենք, որ անհրաժեշտ է ամեն ինչ անել կողմերի դիրքորոշումները մոտեցնելու համար։ Ինչ-որ փուլում թվում էր, թե ի սկզբանե ադրբեջանական առաջարկները, որոնք դրական են ընդունվել հայկական կողմից, թույլ կտան հիմք ստեղծել արդեն համապատասխան իրավական փաստաթղթի մշակման համար, իսկ բանակցային գործընթացին Ռուսաստանի աջակցության անհրաժեշտությունը ճանաչվում է մեր բարեկամների կողմից։ Ավելին, այդ անհրաժեշտությունն ամրագրված է այս տարվա հոկտեմբերի 31-ին Սոչիում երեք երկրների ղեկավարների գագաթաժողովի արդյունքներով ընդունված եռակողմ հայտարարության մեջ։

Ռուսաստանը շահագրգիռ է այս տարածաշրջանում հաստատելու ամուր, արդար խաղաղություն և հուսալիորեն բացառելու հակամարտությունների՝ անցյալի դրսևորումներով որևէ կրկնություն։ Մենք վերլուծել ենք մեր առաջնորդների բոլոր եռակողմ հայտարարությունների իրականացման ընթացքը։ Այդ փաստաթղթերը կազմում են մեր համատեղ աշխատանքի հիմքը, այդ թվում՝ հայ-ադրբեջանական հարաբերությունների կարգավորման ուղղությամբ։ Հուսով ենք՝ մոտ ժամանակներս երեք երկրների փոխվարչապետները, որոնք հանդիսանում են համապատասխան եռակողմ աշխատանքային խմբի համանախագահներ, կկարողանան ձեռնամուխ լինել կոնկրետ պայմանավորվածությունների մշակմանը։ ՌԴ և Ադրբեջանի նախագահների մակարդակով սկզբունքային որոշումը քննարկվել է, դրանք հավանության են արժանացել ՀՀ վարչապետի կողմից։ Այժմ ոչ մի պատճառ չկա, որպեսզի հետագայում ևս ձգձգվի այդ պայմանավորվածությունների գործնական իրականացումը։

Մտքեր փոխանակեցինք հայ-ադրբեջանական սահմանին իրավիճակի կայունացման հարցի շուրջ։ Մենք համակարծիք ենք, որ օպտիմալ լուծումը կլինի սահմանազատման գործնական աշխատանքի շուտափույթ մեկնարկը։ Դրա համար ձևավորվել է հայ-ադրբեջանական համապատասխան երկկողմ հանձնաժողով։ Կողմերը համաձայնել են, որ այն կաշխատի ռուսական խորհրդատվական աջակցությամբ։ Եվ, իհարկե, կարևոր է զերծ մնալ ուժի կիրառման որևէ կրկնությունից, և բոլոր վիճելի հարցերը լուծել բացառապես քաղաքական-դիվանագիտական ճանապարհով։ Պայմանավորվել ենք աջակցել հասարակական կարծիքի առաջնորդների, Հայաստանի և Ադրբեջանի խորհրդարանականների միջև շփումներին՝ նրանց ռուս գործընկերների մասնակցությամբ։ Սա կարևոր տարր է, որը թույլ է տալիս ձևավորել ժողովուրդների միջև վստահության մթնոլորտ և ստեղծում է անհրաժեշտ պայմաններ, որպեսզի ավելի հեշտ և արդյունավետ լուծվեն նաև միջպետական բնույթի հարցերը»,-նշել է Լավրովը։

News.am