2022-ին Ռուսաստանի հետ Հայաստանի ապրանքաշրջանառությունն աճել է ավելի քան 67%–ով

2022 թվականին Հայաստանի հետ Ռուսաստանի փոխադարձ ապրանքաշրջանառությունն աճել է ավելի քան 67%–ով։ Այս մասին այսօր Sputnik Արմենիա մամուլի կենտրոնում կայացած Մոսկվա–Մինսկ–Բիշքեկ–Երևան–Սուխում–Ցխինվալ տեսակապի ժամանակ հայտնեց ՌԴ տնտեսական զարգացման նախարարի տեղակալ Դմիտրի Վոլվաչը։

Նրա խոսքով` անցնող տարում ԵԱՏՄ–ում ակտիվորեն զարգանում էր Միության անդամ երկրների փոխգործակցությունն ու համագործակցությունը։ Մասնավորապես, ակտիվորեն աճում է ներմուծումն ու արտահանումը ծառայությունների ոլորտում։ Ռուսաստանի ապրանքաշրջանառությունը ԵԱՏՄ երկրների հետ աճել է ավելի քան 12%–ով` հասնելով 56 մլրդ դոլարի։

«Հետխորհրդային երկրները շատ արագ արձագանքեցին տնտեսական և աշխարհաքաղաքական նոր պայմաններին։ Ընդհանուր ջանքերի շնորհիվ մեզ հաջողվեց երկարատև թրենդ ապահովել համագործակցության նոր շղթաների, համատեղ ձեռնարկությունների ստեղծման համար, ինչը կապահովի ԵԱՏՄ–ի զարգացումը հետագայի համար», – նշեց Վոլվաչը։

Ի դեպ, Ադրբեջանի հետ Ռուսաստանի ապրանքաշրջանառությունն աճել է 14%–ով։

ՌԴ տնտեսական զարգացման նախարարության արտաքին առևտրի համառուսաստանյան ակադեմիայի ռեկտոր, տնտեսական գիտությունների դոկտոր Սերգեյ Սինելնիկով–Մուրիլյովն իր հերթին ընդգծեց, որ ԵԱՏՄ շրջանակում համագործակցության ուժեղացումը խթան է հանդիսացել անդամ երկրների ազգային տնտեսությունների զարգացման համար։ Այսպես, օրինակ, Հայաստանում տնտեսական աճը գերազանցել է 12%–ը։

Արտաքին առևտրի համառուսաստանյան ակադեմիայի ռեկտորը հայտնեց նաև, որ մաքսային խոչընդոտների և սահմանափակումների չեղարկման հաշվին առևտրի և աշխատուժի տեղաշարժի ոլորտում Հայաստանի ՀՆԱ–ն ավելացել է 1,5%-ով։

Sputnik Արմենիա