«Գազի վաճառքով» պետք չէ զբաղվել. ԱԱԾ-ն զգուշացնում է խարդախության մասին

Սոցիալական կայքերի էջերով տարածվում է գովազդային տեսահոլովակ, որ ՀՀ քաղաքացիները «գազի վաճառքով» զբաղվելու և «Գազպրոմ Հայաստան» ընկերության «արժեթղթերում» ֆինանսական փոքր ներդրումներ կատարելու դիմաց իբրև թե կարող են մեծ գումարներ աշխատել։ ԱԱԾ-ն զգուշացնում է, որ այդ ամենը խարդախություն է։

Պարզվել է` ՀՀ քաղաքացիները Instagram և Facebook սոցցանցերի Way to success (Հաջողության ուղին) անվանումով էջում նկատելով «Գազպրոմի» կողմից առաջարկվող բարձր աշխատավարձով աշխատանքի մասին տարածվող գովազդային հոլովակը` «շահավետ» առաջարկից օգտվելու համար տրամադրել են իրենց անձնական տվյալները։ Դրանից հետո վերջիններիս հետ Whatsapp հավելվածով կապ են հաստատել իբրև թե «Գազպրոմի» աշխատակիցները՝ աշխատանքի մանրամասները քննարկելու նպատակով։

Դեռևս 2022-ի հունիսի 6-ին ԿԲ–ն հայտարարություն էր տարածել, որում նշել էր․

«Արժեթղթերի շուկայում մասնագիտացված մասնակցի կեղծված լիցենզիայի հիման վրա «Գազպրոմ Արմենիայի» անունից հանդես եկող որոշ անձինք հրապարակային առաջարկի միջոցով փորձում են ՀՀ–ում հաճախորդներ ներգրավել, առաջարկելով՝ ներդրումային ծրագրեր։ Հաշվի առնելով, որ նշված կազմակերպությունը չլիցենզավորված գործունեություն է իրականացնում և չի գտնվում ԿԲ վերահսկողության տիրույթում՝ հորդորում ենք զգոն լինել, չվստահել և չարձագանքել նման առաջարկների»։

Սակայն ԱԱԾ–ում կատարված ուսումնասիրությունները ցույց են տվել, որ ՀՀ կենտրոնական բանկի տարածած նախազգուշացնող հայտարարությունից հետո էլ օգտատերերը շարունակում են տրամադրել իրենց անձնական տվյալները՝ հեռախոսահամար, էլեկտրոնային հասցե և բանկային հաշիվ։

ԱԱԾ–ն կոչ է անում խուսափել և զերծ մնալ միջազգային չափանիշների խարդախության սխեմային մասնակցություն ունենալու գայթակղությունից։

Sputnik Արմենիա