Սերգեյ Մելքոնյան․ Հարավային Կովկասում պատերազմի հավանականությունը մեծանում է

Հարավային Կովկասի տարածաշրջանում պատերազմի հավանականությունը մեծանում է։ Այս մասին NEWS.am-ի թղթակցի հետ զրույցում ասաց ՌԴ ԳԱ Արևելագիտության ինստիտուտի Իսրայելի և հրեական համայնքների ուսումնասիրության բաժնի աշխատակից Սերգեյ Մելքոնյանը։

«Փաստորեն, դիվանագիտական հարաբերությունները խզվում են, ադրբեջանցի դիվանագետները հեռացել են Թեհրանից։ Բացի այդ, բախումները շարունակվում են ՄԱԿ-ում և այլ հարթակներում, հնչում են փոխադարձ մեղադրանքներ՝ փորձելով կազուս բելլի (միջազգային իրավունքի տերմին, որը նշանակում է պատերազմի առիթ) գտնել՝ իրենց շահերը պաշտպանելու նոր միջոցներ ձեռնարկելու համար»,- ասաց նա։

Փորձագետը հիշեցրեց, որ Իրանը բազմիցս ցույց է տվել լայնածավալ պատերազմին իր պատրաստ լինելը՝ լայնածավալ զորավարժություններ անցկացնելով Ադրբեջանի հետ սահմանին, որը պատասխանել է Թուրքիայի հետ համատեղ զորավարժություններով, որոնք երկարաժամկետ են և լայնամասշտաբ բնույթ են կրում և դեռևս շարունակվում են։

Երկու կողմերն էլ, նրա գնահատմամբ, պատրաստ են նման սցենարների։

Միաժամանակ, Մելքոնյանը կարծում է, որ Ադրբեջանը կարող է հարձակվել ոչ թե Իրանի, այլ Հայաստանի վրա։

«Այն միջանցքը, որը փորձում է ձեռք բերել Բաքուն, ուղղված է ոչ միայն Հայաստանի, այլ նաև Իրանի դեմ։ Այսպիսով, Ադրբեջանն անուղղակիորեն կարող է հարվածել Իրանի շահերին։ Այս պայմաններում Հայաստանը չպետք է դառնա երրորդ երկրների միջև պատերազմի հարթակ, բայց, միաժամանակ, Հայաստանը չպետք է թույլ տա սեփական կարմիր գծերի խախտումներ»,- եզրափակեց արևելագետը։

News.am