ՄԱԿ-ի գլխավոր քարտուղարը ԱՄՆ-ին և Ռուսաստանին երկխոսության և էսկալացիայից խուսափելու կոչ է անում

ՄԱԿ-ի գլխավոր քարտուղար Անտոնիո Գուտերեշը ԱՄՆ-ին և Ռուսաստանին երկխոսության և էսկալացիայից խուսափելու կոչ է արել։ Այս մասին ճեպազրույցում հայտարարել է գլխավոր քարտուղարի պաշտոնական ներկայացուցիչ Ստեֆան Դյուժարիկը` ի պատասխան Սև ծովում ամերիկյան անօդաչու թռչող սարքի ընկնելու միջադեպը մեկնաբանելու խնդրանքի, փոխանցում է «ՌԻԱ Նովոստին»։

«Մենք զրոյական տեղեկություն ունենք այն մասին, թե կոնկրետ ինչ է տեղի ունեցել։ Մեր ունեցած միակ տեղեկությունը լրատվամիջոցներից է։ ՄԱԿ-ի գլխավոր քարտուղարի արձագանքը կլիներ այնպիսին, ինչպիսին դուք ակնկալում եք՝ նա երկխոսության և ցանկացած էսկալացիայից խուսափելու կոչ կաներ»,- ասել է Դյուժարիկը։

Ռուսաստանի պաշտպանության նախարարությունը հայտնել է, որ երեքշաբթի առավոտյան ամերիկյան MQ-9 անօդաչու թռչող սարքը՝ անջատված տրանսպոնդերներով, խախտել է Սև ծովի օդային տարածքի օգտագործման ժամանակավոր ռեժիմի տարածքի սահմանները։ Անօդաչու թռչող սարքը շարժվել է դեպի Ռուսաստանի սահման, ռուսական կործանիչներն օդ են բարձրացվել՝ խախտողին նույնականացնելու համար։ Կտրուկ մանևրելու պատճառով անօդաչու սարքը անցել է բարձրության կորստով անկառավարելի թռիչքի և ընկել ջուրը։ Ռուսական կործանիչները չեն շփվել MQ-9-ի հետ, չեն կիրառել օդային զինատեսակներ և ապահով վերադարձել են իրենց բազայի օդակայան, ընդգծել է ՌԴ պաշտպանության նախարարությունը։

News.am