Երասխում ռուսական ուղղաթիռի ընկնելու տեղում սկսվել է Եղիա Մարգարեի ժամատուն-տաճարի շինարարությունը

«МИР» Միջազգային մարդասիրական ֆոնդի վարչության ղեկավարության նախաձեռնությամբ Արարատի մարզի Երասխ գյուղում, Ռուսաստանի Դաշնության Պետական դումայի պաշտպանության կոմիտեի աջակցությամբ, սկսվել է Եղիա Մարգարեի ուղղափառ տաճար-ժամատան շինարարությունը՝ «Հիշողության բլուր» նախագծի իրականացման շրջանակում, որը հուշահամալիր է՝ ի հիշատակ Էրեբունի ավիաբազայի Մի-24-ի զոհված ռուս օդաչուների։ Այս մասին տեղեկացրել է «ՄԻՐ» միջազգային մարդասիրական ֆոնդի մամուլի ծառայությունը։

«Ժամատունը կդառնա ռուս օդաչուների հուշահամալիրի մի մասը, այն կառուցվում է մասնավոր նվիրատվություններով։ 2021թ. հունվարին հուշահամալիրի տարածքում տեղի է ունեցել ուղղափառ խաչի տեղադրում և դրվել է Եղիա Մարգարեի տաճարի առաջին աղյուսը։

«Այս գարնանը շինարարության ակտիվ փուլում Արարատի մարզի բնակիչները հիմքի փորման աշխատանքներ կկատարեն, տաճարը կկառուցվի ամռանը և աշնանը՝ տեղի շինարարների ուժերով»,- ասել է «ՄԻՐ»-ի վարչության նախագահ Անդրանիկ Նիկողոսյանը։ «Ապագայում տաճարը բաց կլինի ինչպես Երասխ գյուղի բնակիչների, այնպես էլ եկվորների համար, որոնք կցանկանան աղոթել, մտքերը միավորել Աստծո հետ և հարգել ռուսական ուղղաթիռի անձնակազմի հիշատակը, որը խփվել էր Արարատի մարզում 102-րդ ռուսական ռազմակայանի ավտոշարասյանն ուղեկցելիս։ Ամռանն այն բաց կլինի մշտապես, իսկ ձմռանը՝ պատարագների ժամանակ»,- ասել է Անդրանիկ Նիկողոսյանը։

Համալիրը ներառելու է տաճար-ժամատունը, տաճարամերձ տարածքը, ռազմապատմական թանգարանը, խաչակրաց երթի տեղը, ռուս օդաչուների հուշարձանը և այլ օբյեկտներ։ Համալիրի տարածքում կկառուցվի հետիոտն ճանապարհ, կտնկվեն պտղատու ծառեր, հատապտուղների թփեր, բուժական և դեկորատիվ բույսեր՝ բերված Ռուսաստանի տարբեր վայրերից, այդ թվում և Դոնեցկի Ժողովրդական Հանրապետությունից և Լուգանսկի Ժողովրդական Հանրապետությունից, Զապորոժիեի և Խերսոնի մարզերից։ Նախագծի իրականացման համար կազմակերպվել է աշխատանքային խումբ բարձրորակ մասնագետներից՝ ճարտարապետներ, քանդակագործներ և հատակագծողներ Ռուսաստանից և Հայաստանից»,- նշվել է հաղորդագրությունում։

2020թ. նոյեմբերի 9-ին, Մոսկվայի ժամանակով ժամը մոտ 17.30-ին 102-րդ ռուսական ռազմակայանի ավտոշարասյանը Հայաստանի Հանրապետության տարածքում ուղեկցելիս հայկական Երասխ գյուղի օդային տարածքում, Նախիջևանի Ինքնավար Հանրապետության (Ադրբեջանի Հանրապետություն) սահմանի մոտ ռուսական Մի-24 ուղղաթիռը ենթարկվել է հրթիռակոծման։ Հրթիռի հարվածից ուղղաթիռը կորցրել է կառավարումը և ընկել Հայաստանի լեռնային տարածքում։ Անձնակազմի երկու անդամները զոհվել են, մեկը միջին ծանրության վնասվածքներ է ստացել և տեղափոխվել կայանի աերոդրոմ։

Նույն օրը՝ նոյեմբերի 9-ի երեկոյան, ստորագրվել է ՌԴ-ի, Ադրբեջանի և Հայաստանի ղեկավարների եռակողմ հայտարարությունը ղարաբաղյան հակամարտության գոտում հրադադարի մասին։

Ադրբեջանի ԱԳՆ-ում հայտարարել են, որ Մի-24-ը Հայաստանի տարածքում պատահմամբ է խփվել ադրբեջանցի զինվորականների կողմից։ «Ադրբեջանական կողմը ներողություն է խնդրում ռուսական կողմին՝ ողբերգական միջադեպի հետ կապված, որը կրում է պատահական բնույթ և ուղղված չէ ռուսական կողմի դեմ»,- նշել են ԱԳՆ-ում։ Ադրբեջանական կողմը հայտարարել է, որ պատրաստ է փոխհատուցում վճարել։

News.am