Իշխանությունը գեներալին չեզոքացրել է՝ Տավուշում գալիք կորուստների ֆոնին

Գեներալ Գրիգորի Խաչատուրովի պաշտպանության նախաձեռնությունը պահանջում է ազատ արձակել նրան և դադարեցնել անօրինական քրեական հետապնդումը։

Ինչպես ԶԼՄ-ների հետ նախաձեռնության մասնակիցների հանդիպման ժամանակ ասել է պահեստի գնդապետ Հայկ Նահապետյանը, Գրիգորի Խաչատուրովի ձերբակալմամբ, որը մեծ ավանդ է ներդրել երկրի սահմանների պաշտպանության գործում, իշխանությունները նախաձեռնել են կանխիչ քայլ՝ փորձելով չեզոքացնել գեներալին Տավուշի ուղղությամբ ապագա տարածքային կորուստների ֆոնին։ Զուգահեռ՝ փորձ է արվում մարտական գեներալների վրա բարդել սեփական վրիպումներն ու հանցագործությունները։

Արդարադատության գեներալ-մայոր Թաթուլ Պետրոսյանն ընդգծել է ինչպես Խաչատուրովին վերագրվող արարքների, այնպես էլ նրան կալանքի տակ պահելու չկայացածությունը։ «Գործում չկա որևէ ապացույց, իսկ ամբողջ գործը կառուցվել է ջրմուղագործի ցուցմունքների վրա, որին արդեն մահացած ինչ-որ մեկն ամեն ինչ պատմել է։ Գործը հատուկ միացրել են մյուսներին, պահանջել քննել «գաղտնի» գրիֆի ներքո, այսինքն՝ դռնփակ։ Եթե բացերի դեպքում ակնհայտ խախտումներ կան, ապա կարող եք պատկերացնել, թե ինչ է կատարվում դռնփակի դեպքում»,- նշել է Պետրոսյանը՝ հիշեցնելով դատախազներին և քննիչներին. Խաչատուրովի անօրինական քրեական հետապնդման և անօրինական ձերբակալման համար ապագայում պետք է պատասխան տան։

ԱԱԾ-ի նակին տնօրեն Միքայել Համբարձումյանն ընդգծել է, որ իշխանությունները համակարգից հեռացնում են պրոֆեսիոնալներին։ Չանդրադառնալով մեղադրանքի բովանդակությանը՝ նա նկատել է, որ խոսքը 15-ամյա վաղեմության դեպքի և ընդամենը 18 մլն դրամ արժողությամբ գործարքի մասին է։ «Հանրային վտանգավորության աստիճանով ինքներդ գնահատեք... Բացի այդ, վաղեմության ժամկետն ավարտվում է 2024թ. հունվարին, ինչը նույնպես վկայում է «վտանգավորության» աստիճանի մասին, նշել է Համբարձումյանը՝ ավելացնելով, որ ոչ մի տվյալ չկա, որը կվկայեր գեներալին կալանքի տակ պահելու անհրաժեշտության մասին։

Վաստակավոր արտիստ Դավիթ Ամալյանը, որի որդին զոհվել է պատերազմում, իշխանությունների պահվածքը բնութագրել է որպես «նեղացածների»։ Պատերազմում մեկ այլ զոհվածի մայրը՝ Աննա Մկրտչյանը, կարծում է, որ արվում է ամեն ինչ, որպեսզի թուլացվի բանակը, իսկ, այն, ինչ կատարվում է գեներալի նկատմամբ, այդ քաղաքականության ուղիղ հետևանքն է։

«Կամք» նախաձեռնության հիմնադիր Վահագն Չախալյանը հայտարարել է, որ իշխանությունները պարզապես գեներալ Խաչատուրովին զոհ են մատուցում թուրք-ադրբեջանական տանդեմին, բացում նոր կորուստների ճանապարհը։ «Գաղտնիք չէ, որ նրանք, իշխանության գալով, անհաշտ պայքար են մղում բանակի դեմ։ Դասալիքները պատերազմ են վարում բանակի և անձամբ Խաչատուրովների ընտանիքի դեմ»,- ասել է Չախալյանը՝ կոչ անելով ակցիաներ կազմակերպել փողոցում։

Ամփոփելով արդյունքները՝ Հայկ Նահապետյանը նշել է, որ նախաձեռնությունը փորձելու է հասնել արդարության, գործել օրենքի դաշտում, ինչով տարբերվելու է իշխանություններից։

News.am