Արմեն Աշոտյանի փաստաբան․ Տրամադրությունը մարտական է (ՏԵՍԱՆՅՈՒԹ)

ՀՀԿ փոխնախագահ Արմեն Աշոտյանի փաստաբան Տիգրան Աթանեսյանը պատրաստվում է դիմել Մարդու իրավունքների եվրոպական դատարան։ Նա այդ մասին հայտարարեց այսօր՝ հուլիսի 19-ին, լրագրողների հետ հանդիպման ժամանակ։

Փաստաբանը վստահեցրեց, որ իրենք դիմելու են իրավաբանական պայքարի բոլոր մեթոդներին, եթե գործը գնա դատարան, ապա կօգտագործեն նաև այդ ամբիոնը։

Խոսելով Աշոտյանի պահման պայմանների մասին` Աթանեսյանը հայտնեց, որ նա պահվում է սովորական խցում. «Արմենի տրամադրությունը մարտական է, որևէ ընկճում չկա: Հիմա կյանքի այդ հանգրվանն է, քաղաքական գործչի համար դժվար փուլ է Հայաստանում, որը պետք է անցնի պատվով, և ես վստահ եմ, որ այդպես էլ կլինի»:

Անդրադառնալով իրավապաշտպան կառույցների արձագանքներին, փաստաբանն ասաց. «Հայաստանում իրավապաշտպան չկա, բացի Ավետիք Իշխանյանից: Բոլոր իրավապաշտպաններին, որոնց տեսնում էինք մինչև այսպես կոչված, հեղափոխությունը, ընդամենը սորոսական էին, ընդամենը ֆինանսավորվում էին, դա բիզնես էր: Տեսեք, թե ինչ հսկայական գրանտներ են ստացել, ինչեր էին խոսում, ո՞ւր են, չկան: Որովհետև այդ ուղղությամբ գրանտներ չեն տալիս: Մենք շատ տխուր ու թերզարգացած հասարակություն ենք: Իսկ միջազգային կառույցների մասին սխալ տպավորություն է, որ նրանք գալիս են Հայաստանը ծաղկեցնելու, շենացնելու, օգնելու: Այդ բոլոր կառույցները և պետությունները թքած ունեն Հայաստանի վրա: Հայաստանն իրենց համար մի պետություն է, որ ռուսական ազդեցության տակ է, պետք է այդտեղից հանել: Թե արանքում 5 հազար մարդ կսպանեն, թե 100 հազար, իրենք բացարձակ թքած ունեն: Մյուս կողմից ո՞վ կարող է հարգել մի ազգի, որն ընտրում է Նիկոլին»,-ասաց Աթանեսյանը:

Նշենք, որ Արմեն Աշոտյանը երկու ամսով կալանավորվել է հունիսի 16–ին։ Նա և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող մոտ 100 հազար դոլարի գույք հափշտակելու մեջ: Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը:

News.am