Ինչպես կպատասխանի Մոսկվան ԱԹՍ-ների հարձակմանը. Պեսկովի մեկնաբանությունը

Մոսկվայի վրա անօդաչու թռչող սարքերով հարձակման պատասխանը կլինի ռազմական հատուկ գործողության շարունակումը և դրա նպատակների իրագործումը: Լրագրողների հետ զրույցում այս հայտարարությունն է արել ՌԴ նախագահի մամուլի քարտուղար Դմիտրի Պեսկովը։

«Ռազմական հատուկ գործողությունը շարունակվում է և կշարունակվի։ Եվ մենք կհասնենք դրա նպատակներին»,-ասել է Պեսկովը՝ պատասխանելով հարցին, թե արդյոք Ռուսաստանի կողմից որևէ պատասխան կլինի ուկրաինական օբյեկտների ուղղությամբ:

Ավելի վաղ Մոսկվայի քաղաքապետ Սերգեյ Սոբյանինը հայտնել էր, որ մոտավորապես ժամը 4.00-ին գրանցվել են անօդաչու թռչող սարքերի հարվածներ մայրաքաղաքի երկու ոչ բնակելի շենքերի ուղղությամբ, լուրջ ավերածություններ և տուժածներ չկան: Ռուսաստանի պաշտպանության նախարարությունը հայտարարել էր, որ կանխվել է երկու ԱԹՍ–ով ահաբեկչական հարձակում իրականացնելու փորձը, ռադիոէլեկտրոնային պայքարի միջոցները ճնշել են դրանք:

Պեսկովի խոսքով՝ ՌԴ շրջանների վրա անօդաչու թռչող սարքերով հարձակվելու ուկրաինական փորձերը հաճախակի են դարձել, սակայն անվտանգությունն ապահովող բոլոր ծառայությունները զգոն են:

«Ինչպես տեսնում եք, վերջին օրերին ավելացել է մեր շրջանների վրա ԱԹՍ-ներով գրոհելու փորձերի ինտենսիվությունը։ Այդ պատճառով միջոցներ են ձեռնարկվում, շատ լարված ամենօրյա շուրջօրյա աշխատանք է ընթանում»,-ասել է ՌԴ նախագահի մամուլի քարտուղարը։

Պատասխանելով հարցին, թե արդյոք մայիսին անօդաչուների հարձակումից հետո Մոսկվայում ՀՕՊ համակարգի հետ աշխատանքներ տարվել են, Պեսկովը նշել է, որ հարցն ավելի շատ վերաբերում է պաշտպանության նախարարությանը, սակայն այդ ուղղությամբ միջոցներ են ձեռնարկվում:

Նա ընդգծել է, որ Ռուսաստանի զինված ուժերը երբեք հարվածներ չեն հասցնում Ուկրաինայի սոցիալական ենթակառուցվածքներին և վանքերին։

«Մեր զինված ուժերը երբեք չեն հարվածում սոցիալական ենթակառուցվածքի օբյեկտներին կամ առավել ևս վանքերին, եկեղեցիներին և նմանատիպ այլ օբյեկտներին։ Ուստի նման մեղադրանքները մենք չենք ընդունում, դա բացարձակ սուտ է։ Այնտեղ խոսքը հակահրթիռների մասին է, որոնք արձակվել են և որոնք իրենք են ավերել այդ տաճարը»,-ասել է Պեսկովը։

Հուլիսի 23-ին ՌԴ ՊՆ-ն հերքել էր ուկրաինական կողմի հաղորդագրությունն այն մասին, որ բարձր ճշգրտության զենքի կիրառման հետևանքով Օդեսայում խոցվել է Պայծառակերպության տաճարը: Գերատեսչության տվյալներով՝ վանքի ավերման ամենահավանական պատճառն այն է, որ հակաօդային պաշտպանության համալիրների օպերատորների անգրագետ գործողությունների հետևանքով ուկրաինական կառավարվող զենիթային հրթիռ է ընկել։

Sputnik Արմենիա