ՌԴ մաքսատունը զգուշացրել է Վերին Լարսի թողունակության հնարավոր նվազման մասին

Ռուս-վրացական սահմանի «Վերին Լարս» մաքսակետի թողունակությունը օգոստոսի 17-26-ը հնարավոր է նվազի։ Ինչպես հայտնում է Ռուսաստանի Դաշնային մաքսային ծառայությունը (ԴՄԾ), թողունակության նվազումը կապված է վերանորոգման աշխատանքների հետ: Տեղեկությունը հայտնում է ՌԻԱ Նովոստին՝ հղում անելով գերատեսչության հաղորդագրությանը։

«Զգուշացնում ենք Վերին Լարսի վերակառուցման հերթական փուլի անցկացման մասին։ «Վերին Լարս» անցակետում 2023 թվականի օգոստոսի 17-ից 26-ը Ռուսաստանից դուրս եկող ճանապարհային գծերի ասֆալտապատում կիրականացվի», - հայտնել է Դաշնային մաքսային ծառայությունն իր Telegram ալիքում:

Նշվում է, որ վերանորոգման աշխատանքները կհանգեցնեն ինչպես բեռնատար, այնպես էլ թեթև մարդատար տրանսպորտային միջոցների երթևեկության գոտիների փուլերով շահագործումից դուրս բերմանը:

Մաքսավորները խորհուրդ են տալիս այլընտրանքային երթուղիները դիտարկել, ինչպես նաև պլանավորել սահմանը հատելու օրն ու ժամը՝ հաշվի առնելով աշխատանքների իրականացումը:

Ռուս-վրացական սահմանին գտնվող Հյուսիսային Օսեթիայի «Վերին Լարս» ավտոմոբիլային անցակետը «Հյուսիս-Հարավ» միջազգային տրանսպորտային միջանցքի ամենածանրաբեռնված անցակետն է. դրանով վերջին ամիսներին ավտոտրանսպորտի հոսքը կարող էր գերազանցել օրական հազար ավտոմեքենա՝ չնայած այնտեղ իրականացվող վերակառուցման աշխատանքներին: Այս տարվա մայիսին «Վերին Լարսում» երթևեկության 25 գոտիներին ավելացել է 11 նոր գոտի, իսկ հունիսի 15-ին գործարկվել է ևս երեքը:

Sputnik Արմենիա