Պապիկյանը չինացի պաշտոնյայի հետ քննարկել է համագործակցության զարգացման հեռանկարները

Հայ–չինական պաշտպանության բնագավառի մի շարք ոլորտներում համագործակցության ընդլայնման մեծ ներուժ կա։ Այս մասին նշվել է ՀՀ պաշտպանության նախարար Սուրեն Պապիկյանի և ՉԺՀ կենտրոնական ռազմական խորհրդի նախագահի տեղակալ, ՉԺՀ կոմունիստական կուսակցության քաղաքական բյուրոյի անդամ, գեներալ–գնդապետ Խը Ուեյդոնի հանդիպմանը, հայտնում է ՀՀ պաշտպանության նախարարության մամուլի ծառայությունը։

Նշվում է, որ Պապիկյանը չինացի պաշտոնյայի հետ հանդիպել է Չինաստանի Ժողովրդական Հանրապետություն կատարած այցի շրջանակում։

Հանդիպմանը քննարկվել են պաշտպանության բնագավառում համագործակցությանը և դրա զարգացման հնարավորություններին առնչվող մի շարք այլ հարցեր։

Նշենք, որ Պապիկյանի գլխավորած պատվիրակությունը Չինաստանի Ժողովրդական Հանրապետություն է մեկնել հոկտեմբերի 29–ին` մասնակցելու Պեկինի Սյանշանի 10-րդ համաժողովի բացման հանդիսավոր արարողությանը և լիագումար նիստին:

Նշենք, որ Սյանշանի անվտանգության 10-րդ համաժողովն այս տարի կանցկացվի հոկտեմբերի 29-31-ը։ Դրան կմասնակցեն պաշտոնական պատվիրակություններ ավելի քան 90 երկրից, այդ թվում՝ Մեծ Բրիտանիայից, Իրանից, Ռուսաստանից, Սաուդյան Արաբիայից և ԱՄՆ-ից։

Համաժողովի ընթացքում ՉԺՀ-ի Կենտրոնական ռազմական խորհրդի (ՌԿԽ) ղեկավարները երկկողմ հանդիպումներ կունենան այլ երկրների պատվիրակությունների ղեկավարների հետ։

Միջոցառման գլխավոր թեման է «Ընդհանուր անվտանգություն, կայուն խաղաղություն»։ Եռօրյա համաժողովի մասնակիցները մտքեր կփոխանակեն գլոբալ և տարածաշրջանային անվտանգության խնդիրների վերաբերյալ։

Ավելի վաղ ադրբեջանական լրատվամիջոցները հայտնել էին, որ Չինաստան է մեկնել նաև Ադրբեջանի պաշտպանության նախարար Զաքիր Հասանովը։

Sputnik Արմենիա