Արտակարգ դրություն կսահմանվի՞. Գնել Սանոսյանն առաջարկով դիմեց Փաշինյանին (ՏԵՍԱՆՅՈՒԹ)

Շատ կրևոր է, որ կարողանանք վնասների օբյեկտիվ հաշվարկ իրականացնել: Այս մասին այսօր՝ մայիսի 27-ին, Լոռու և Տավուշի մարզերում արտակարգ իրավիճակի կառավարման օպերատիվ շտաբի հեռավար նիստի ժամանակ ասաց ՀՀ վարչապետ Նիկոլ Փաշինյանը:

ՏԿԵ նախարար Գնել Սանոսյանը զեկուցեց, որ այդ ուղղությամբ որոշակի աշխատանքներ արդեն իրականացվել են. «Ճամփեզրին առկա շենք շինությունների մասին տվյալները սկսել ենք հավաքագրել: Վնասի հաշվարկման նպատակով հանձնաժողովների ձևավորման նախնական աշխատանքները սկսվել են: Տարբեր հատվածներում տարբեր տնտեսություններ են վնասվել և համայնքներն ու մարզպետարանները խնդիրները գույքագրելու աշխատանքները սկսել են»:

Վարչապետը հարցրեց, թե արդյոք միջազգային օգնության համար դիմելու կարիք կա, թե՞ դեռ կառավարելի է իրավիճակը: Սանոսյանն ասաց. «Եվ ծավալների, և ժամանակի առումով, և ֆինանսական առումով հսկայական վնասներ են կրել: Վնասների մի մասը նույնիսկ տեսանելի չէ, մենք ուղղակի պատկերացնում ենք, որ դրանք վնասվել են: 14-ից ավելի կամուրջներ կան, որոնցից 5-6-ը բավական խոշոր կամուրջներ են: Մ6 միջպետական ճանապարհը որոշ հատվածներում ամբողջությամբ վնասվել է, ինչի վերականգնումը մեծ ծավալի և ֆինանսական, և ժամանակային աշխատանք է պահանջելու: Հսկայական այգիներ են վնասվել, որոնք պետք է փոխհատուցենք: Ֆինանսական շատ մեծ բեռ է լինելու կառավարության վրա»:

Փաշինյանն ասաց, որ կհանձնարարի ԱԳՆ նախարարին, հասկանալու, թե ինչ միջազգային օգնություն կարող ենք ստանալ այդ վնասները վերականգնելու համար:

Սանոսյանն էլ ասաց. «Պետք է հնձնարարական, փորձենք հասկանալ՝ արդյոք արտակարգ դրություն պետք է հայտարարել, թե ոչ»:

News.am