ՔԿ․ «Տավուշը հանուն հայրենիքի» շարժման համակիրները ավտոմեքենայի են հարվածել

«Տավուշը հանուն հայրենիքի» շարժման անհնազանդության ակցիայի մասնակիցները մայիսի 13-ին Երևանի Զ․ Սարկավագի փողոցում աղբամաններով փակել են «Օպել» մակնիշի ավտոմեքենայի դիմացը, բայց երբ վարորդը փորձել է շրջանցել՝ հարվածներ են հասցվել մեքենային՝ պատճառելով գույքային վնաս։ Տեղեկությունը հայտնում է ՀՀ քննչական կոմիտեն։

Նշվում է, որ Երևան քաղաքի բնակիչը «Օպել» մակնիշի ավտոմեքենայով Աբովյան քաղաքից 5 երեխայի է տեղափոխելիս եղել դպրոց, երբ շարժման համակիրները փակել են փողոցը։

«Երբ երիտասարդները մերժել են վարորդի՝ ճանապարհը բացելու խնդրանքը, վերջինս փորձել է շրջանցել ճանապարհի արգելափակված հատվածը: Այդ ընթացքում երիտասարդները հարվածել են ավտոմեքենայի տարբեր հատվածներին՝ արգելելով ավտոմեքենայի ընթացքը: Պարզվել է, որ ավտոմեքենային հարվածած անձանցից մեկը 19-ամյա երիտասարդ է: Նախաքննության ընթացքում զննվել է «Օպել» մակնիշի ավտոմեքենան, որի վրա հայտնաբերվել են վնասված հատվածներ»,- ասված է հաղորդագրությունում։

19-ամյա երիտասարդին մեղադրանք է առաջադրվել ՀՀ քրեական օրենսգրքի 297-րդ հոդվածի 2-րդ մասի 1-ին կետով (խուլիգանություն, որը կատարվել է մի խումբ անձանց կողմից)։ Նրա նկատմամբ խափանման միջոց է կիրառվել տնային կալանքը։ Երիտասարդի մասով նախաքննությունն ավարտվել է, և վարույթի նյութերը, մեղադրական եզրակացությամբ, ուղարկվել են հսկողություն իրականացնող դատախազին՝ դատարան ուղարկելու նպատակով։

Մյուսների մասով նախաքննությունը շարունակվում է: Միջոցառումներ են ձեռնարկվում մյուս մասնակիցների ինքնությունը պարզելու, նրանց հայտնաբերելու ուղղությամբ։

Հիշեցնենք, որ մայիսի 13-ին հանրապետության տարբեր բնակավայրերում խաղաղ անհնազանդության ակցիաների իրականացման ժամանակ 171 քաղաքացի էր բերման ենթարկվել։

Sputnik Արմենիա