ԱՄՆ-ի մի քանի ռազմակայաններ ամբողջ Եվրոպայում բերվել են բարձր պատրաստվածության վիճակի

Այս շաբաթավերջին Եվրոպայում մի քանի ամերիկյան ռազմաբազաներ բարձր պատրաստության վիճակի են բերվել, իսկ ուժային պաշտպանության մակարդակը բարձրացվել է երկրորդ ամենաբարձր մակարդակի՝ մտահոգությունների պատճառով, որ ԱՄՆ զինվորական անձնակազմը կամ օբյեկտները կարող են թիրախ դառնալ ահաբեկչական հարձակման, հաղորդում է CNN-ը՝ վկայակոչելով ամերիկացի պաշտոնյաներին:

Պաշտոնյաները հայտնել են, որ հենակետերը, այդ թվում՝ ԱՄՆ բանակի Շտուտգարտի կայազորը Գերմանիայում, որտեղ տեղակայված է ԱՄՆ եվրոպական հրամանատարությունը, կիրակի օրը բարձրացրել են իրենց զգոնության մակարդակը մինչև Չարլիի մակարդակ:

Ըստ ԱՄՆ բանակի, այս կարգավիճակը կիրառվում է, երբ միջադեպ է տեղի ունենում կամ ստացվում է հետախուզական տեղեկատվություն, որը ցույց է տալիս ահաբեկչական գործողության կամ հարձակման որևէ ձևի հավանականությունը անձնակազմի կամ օբյեկտների վրա:

Եվրոպայում տեղակայված ամերիկացի պաշտոնյաներից մեկը CNN-ին ասել է, որ իրենք չեն տեսել սպառնալիքի այս մակարդակը առնվազն 10 տարի է՝ հավելելով, որ դա սովորաբար նշանակում է, որ բանակը ստացել է «ակտիվ և վստահելի սպառնալիք»: Միաժամանակ, ԱՄՆ զինված ուժերի եվրոպական հրամանատարության ներկայացուցիչը հրաժարվել է մեկնաբանել զինված ուժերի պաշտպանության կոնկրետ մակարդակները։ Սակայն նա CNN-ին ասել է, որ հրամանատարությունը մշտապես գնահատում է տարբեր գործոններ, որոնք ազդում են արտասահմանում ԱՄՆ ռազմական համայնքի անվտանգության վրա:

Անհասկանալի է, թե ինչ հետախուզություն է խթանել անվտանգության միջոցառումների ուժեղացումը, սակայն եվրոպական իշխանությունները նախազգուշացրել են մայրցամաքում պոտենցիալ ահաբեկչական սպառնալիքի մասին, հատկապես հուլիսին Փարիզի Օլիմպիական խաղերից և Գերմանիայում ֆուտբոլի Եվրոպայի ընթացիկ առաջնությունից առաջ: Գերմանիայի կառավարությունը 580 միջազգային ոստիկան է բերել՝ գերմանացի սպաների կողքին անվտանգություն ապահովելու համար:

News.am