Եվրահանձնաժողովը գործարկում է Հայաստանի հետ վիզային ռեժիմի ազատականացման շուրջ երկխոսությունը

Արտաքին հարաբերությունների խորհրդի նախօրեին արված հայտարարությունից հետո Եվրահանձնաժողովը վիզային ռեժիմի ազատականացման շուրջ երկխոսություն է սկսում Հայաստանի հետ։ Այս գործընթացը կսատարի Հայաստանին հասնելու ԵՄ-ի հետ առանց վիզայի ռեժիմի ստեղծման իր հեռահար նպատակին։ Դրա մասին ասված է Եվրահանձնաժողովի մամուլի ծառայության հաղորդագրության մեջ։

«Երկխոսությունը կհանգեցնի բարեփոխումների այնպիսի կարևոր ոլորտներում, ինչպիսին են ճամփորդական փաստաթղթերի անվտանգությունը, սահմանների կառավարումը, միգրացիան և ապաստանը, հասարակական կարգը, արտաքին հարաբերությունները և Հայաստանում հիմնարար իրավունքները: Հանձնաժողովը Եվրոպական խորհրդարանի և Խորհրդի հետ սերտ համագործակցությամբ ուշադիր հետևելու է այս ոլորտներում առաջընթացին:

Երկխոսությունը կանցկացվի Վիզաների ազատականացման գործողությունների ծրագրի (VLAP) շրջանակում, որը խորհրդում քննարկումից հետո կներկայացվի Հայաստանի իշխանություններին։ Վիզաների ազատականացումը ավտոմատ գործընթաց չէ։ Այն կքննարկվի միայն, երբ երկխոսությունը հաջողությամբ ավարտվի և VLAP-ում թվարկված բոլոր պայմանները կատարվեն: Երկխոսության հաջող ավարտից հետո Հայաստանի քաղաքացիների համար ավելի հեշտ և էժան կլինի կարճաժամկետ այցերով Եվրոպա մեկնելը (ցանկացած 180 օրվա ընթացքում 90 օրից պակաս): Հայաստանի քաղաքացիները 2014 թվականի հունվարի 1-ից արդեն օգտվում են ԵՄ-ի հետ վիզային ռեժիմի դյուրացման համաձայնագրի առավելություններից։

Վիզաների ազատականացման երկխոսության մեկնարկը հաջորդում է ԵՄ Արևելյան գործընկերության շրջանակում Հայաստանի հետ համագործակցության ամրապնդմանն ուղղված մի շարք նախաձեռնություններին, դրանց թվում՝ 2021 թվականի Արևելյան գործընկերության գագաթնաժողովին, որը քննարկում էր մուտքի արտոնագրերի ազատականացման նոր երկխոսությունների մեկնարկի հնարավորությունը՝ համապատասխան պայմանների կատարման դեպքում:

Արևելյան գործընկերությունը ստեղծվել է 2009 թվականին՝ նպատակ ունենալով ամրապնդել հարաբերությունները հարևան երկրների հետ։ Նախագահ ֆոն դեր Լայենի, Բարձր հանձնակատար Ժոզեպ Բորելի և վարչապետ Փաշինյանի միջև 2024 թվականի ապրիլի 5-ին տեղի ունեցած հանդիպումից հետո ԵՄ-ն և Հայաստանը ձեռնամուխ են եղել գործընկերության նոր և հավակնոտ ծրագրին»,- ասված է ԵՀ-ի հայտարարության մեջ։

News.am