ԱՕԿՍ-ի շենքի վարձակալության մրցույթի արդյունքներն ամփոփվել են․ հայտնի է վարձավճարի չափը

Երևանի Աբովյան 3 հասցեում գտնվող հայտնի ԱՕԿՍ-ի շենքի վարձակալության մրցույթի արդյունքներն ամփոփվել են։ Այս մասին հայտնում է ՀՀ Պետական գույքի կառավարման կոմիտեն։

Մրցույթում հաղթող է ճանաչվել բրենդային հագուստի դիստրիբյուտոր «ԶԵԹ ԸՆԴ ԷՅ» ՍՊԸ-ն՝ առաջարկելով 16,200,000 դրամ վարձավճարի չափ։

«Տարածքի շահագործման արդյունքում մեկ հարկի տակ է միավորվելու բարձր արվեստը և նորաձևությունը։ Գործելու են ցուցասրահ, զարգացման արվեստանոց, «Red Book» և դասական սրճարաններ»,–հայտնում է կոմիտեն։

ԱՕԿՍ–ի շենքը վարձակալության է տրվում 10 տարի ժամկետով։ Նախատեսվում է երկու տարում շենքում իրականացնել 1 մլրդ 170 մլն դրամի ներդրում։

Հավելենք, որ մայրաքաղաքում պահպանված ամենագեղեցիկ շենքերից մեկում, որը կառուցվել է 1910-ականներին և պատկանում էր բժիշկ Հովհաննես Հովհաննիսյանին, 1944 թվականից գործում էր արտասահմանյան երկրների հետ մշակութային կապերի հայկական ընկերությունը (ԱՕԿՍ) ։

Շենքի հետ կապված դատական գործ կար, որում ներգրավված էին նաև 2012-2016 թթ. ՀՀ մշակույթի նախարարի պաշտոնը զբաղեցրած Հասմիկ Պողոսյանը և Իսրայելում և ՌԴ–ում ՀՀ նախկին դեսպան Արմեն Սմբատյանը։

2023–ի սեպտեմբերի 9–ին ԱՕԿՍ–ի շենքի սեփականության իրավունքը փոխանցվեց Հայաստանի Հանրապետությանը։

Sputnik Արմենիա