Թովմասյան․ Ըստ մեղադրողի՝ միայն այն փաստերն են ճիշտ, որոնք ուղղված են իմ մեղավորությունը ապացուցելուն

Իմ պաշտպանների ճառերի ժամանակ դատավորն ու մեղադրողը անհաղորդ էին նստած։ Անհաղորդ էր դատարանը, հաղորդակից էր դառնում այդ խոսքին միայն այն ժամանակ, երբ խոսքը վերաբերում էր հենց դատարանին: Այս մասին, այսօր՝ սեպտեմբերի 11-ին, Երևանի ընդհանուր իրավասության դատարանի Կենտրոն նստավայորւմ դատավոր Տաթևիկ Գասպարյանի նախագահությամբ ընթացող դատական նիստում հայտարարեց ՍԴ նախկին նախագահ, այժմ ՍԴ դատավոր ՍԴ դատավոր Հրայր Թովմասյանը՝ հանդես գալով պաշտպանական ճառով։

Նա նշեց, որ մեղադրող կողմի մասին չի խոսում, տեսել է՝ անընդհատ գրառումներ են անում. «Ի սկզբանե մեղադրող կողմը եկել է այս դատաքննությանը մեկ նպատակով՝ կանխորոշված որ եթե կա ինչ-որ կա Թովմասյանի օգտին, նրա անմեղությունը հիմնավորող, նրան մեղսագրվող փաստերը հերքող, դրանք բոլորը սուտ են, կեղծիք են, դրանք գոյություն ունենալ չեն կարող։ Եվ միայն այն փաստերն են ճիշտ, որոնք ուղղված են Հրայր Թովմասյանի մեղավորությունը ապացուցելուն»,- ընդգծեց Թովմասյանը:

Հիշեցնենք, որ Հրայր Թովմասյանին մեղադրանք է առաջադրվել պաշտոնեական լիազորությունները չարաշահելու համար, որն առաջացրել է ծանր հետևանքներ։ Մեղադրող կողմը պահանջում է 7 տարվա ազատազրկում: Թովմասյանը չի ընդունում մեղադրանքը և որակում է այն քաղաքական հետապնդում:

News.am