«Մարտի 1»-ի գործով դատախազ․ Իրավական որակումը փոխվելու է

«Բոլորին հայտնի են սույն գործով Սահմանադրական դատարանի ու Վճռաբեկ դատարանի կայացրած որոշումներն ու հստակ արձանագրվել է, որ այն դեպքերում, երբ արարքը պարունակում է Քրեական օրենսգրքով նախատեսված այլ հանցագործության հատկանիշներ, մեղադրողն իրավասու է փոխել մեղսագրվող արարքի իրավաբանական գնահատականը, այլ կերպ ասած՝ իրավական որակումը»,-Հակակոռուպցիոն դատարանում վերսկսված «մարտի 1»-ի գործով դատական առաջին նիստից հետո լրագրողների հետ զրույցում ասաց հանրային մեղադրող Հայկ Հովհաննիսյանը:

Նա նշեց, որ, բնականաբար, իրավական որակումը փոխվելու է, համապատասխան որոշում է ներկայացվելու դատարանին և մեղադրյալներին։

Դատախազը նշեց, որ հավելյալ կասեն, թե ինչ հոդվածով է փոխվելու որակումը:

«Մարտի 1-ի գործի քննությունը սկսվելու է զրոյից։ Դեռ չենք հասել խափանման միջոցների հարցի քննությանը, դա ևս սահմանված ընթացակարգով»,- ասաց գործով դատախազը:

Նա նշեց, որ «մարտի 1»-ի գործի քննությունը իրականացվում է 2022 թվականի հուլիսի 1-ից գործող քրեական դատավարության օրենսգրքով, հստակ սահմանված են ընթացակարգեր կան, որոնք հաղթահարելու դեպքում, հավանաբար հաջորդ նիստում նման որում կներկայացվի դատարան։

Հիշեցնենք, որ վճռաբեկ դատարանը բեկանել է Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործը կարճելու որոշումը․ գործը բացվել է Հակակոռուպցիոն դատարանում։

Panorama.am