Միայն ակադեմիան եմ թողնում. «Փյունիկի» սեփականատերը որոշել է ընդլայնել ակումբը

Հայաստանի ֆուտբոլի չեմպիոն «Փյունիկ» ակումբի սեփականատեր Արթուր Սողոմոնյանը մտադիր է ակումբն ընդլայնել այլ մարզաձևերով:

Այս մասին նա ասել է «Սպորտ-Էքսպրես» պարբերականի հետ զրույցում։

Ավելի վաղ Սողոմոնյանը հայտարարել էր, որ վաճառքի է հանել ակումբը Հայաստանի ֆուտբոլի ֆեդերացիայի ճնշումների պատճառով:

«Ես չեմ հեռանում ֆուտբոլից։ Ես միայն ակադեմիան եմ թողնում։ Ավելին, ընդլայնում եմ «Փյունիկը»՝ ընդգրկելով այլ մարզաձևեր։ Ծրագրել եմ կառուցել թենիսի դաշտեր, լողավազան և մարտական մարզաձևերի դահլիճ։ Ուզում եմ «Փյունիկից» ստեղծել մարզական ակումբ, ինչպես իրենց ժամանակ դա արել են մոսկովյան «Սպարտակը», Մոլդովայում «Շերիֆը» կամ «Դինամո» սպորտային ընկերությունը»,– ասել է նա։

Սողոմոնյանի խոսքով ՝ ակումբի ընդլայնումը հատկապես օգտակար է նրանց համար, ովքեր մանկության տարիներին զբաղվում են մի քանի մարզաձևերով, իսկ ապագայում դա մեծ առավելություն կտա պրոֆեսիոնալ սպորտում:

«Իմ պլաններում է զարգացնել ոչ միայն ֆուտբոլը, այլև ընդհանուր մարզական ուղղությունը երկրում։ Հուսով ենք՝ ինչ-որ բան կբացենք նաև Ռուսաստանում»,– ասել է նա։

Հավելենք, որ «Փյունիկ»-ՀՖՖ հակամարտությունը սկսվել է այն ժամանակից, երբ ակումբը ձեռք բերած Արթուր Սողոմոնյանը քննադատություններ է հնչեցրել ՀՖՖ-ի հասցեին։ Գործը հասել է նրան, որ ՀՖՖ նախագահ Արմեն Մելիքբեկյանը 2023-ի մայիսին դատական հայց է ներկայացրել Սողոմոնյանի նկատմամբ։

Sputnik Արմենիա