Փոլ Գավան․ Ադրբեջանում ընտրությունները կստիպեն կարմրել նույնիսկ Հյուսիսային Կորեայի ղեկավարությանը

«Ցանկանում եմ մեծ մտահոգություն հայտնել Ադրբեջանի ավտորիտար վարչակարգի կողմից սեփական քաղաքացիների նկատմամբ ճնշումների ուժեղացման, ինչպես նաև Լեռնային Ղարաբաղի նախկին քաղաքացիների նկատմամբ նրա սարսափելի վերաբերմունքի և հարևան երկրի՝ Հայաստանի նկատմամբ նրա ռազմատենչ և սպառնալից պահվածքի կապակցությամբ»,- այս մասին հայտարարել է ԵԽԽՎ իռլանդացի պատգամավոր Փոլ Գավանը՝ ԵԽԽՎ-ում «Ադրբեջանում մարդու իրավունքների վիճակի և ժողովրդավարության վատթարացումը» թեմայով քննարկման ժամանակ։

Նա իր ելույթում նաև նշել է․

«Այս տարի այսպես կոչված նախագահական և խորհրդարանական ընտրություններն անցկացվեցին այնպես, որ նույնիսկ Հյուսիսային Կորեայի ղեկավարությունը կկարմրեր: Նախագահ Ալիևը հինգ անգամ անընդմեջ հաղթել է ընտրություններում այն բանից հետո, երբ 2003 թվականին այդ պաշտոնում փոխարինել է իր հորը: 2009-ի հանրաքվեն վերացրել է նախագահի պաշտոնավարման ժամկետի սահմանափակումը, իսկ 2016-ին ստեղծվել է փոխնախագահի պաշտոնը և, անակնկալ՝ նվերը տրվեց նախագահի կնոջը։

Որպեսզի հասկանալի լինի, մենք խոսում ենք դաժան բռնապետության մասին, որը ղեկավարվում է ընտանեկան մաֆիոզ դինաստիայի կողմից և որը պատասխանատու է Լեռնային Ղարաբաղում էթնիկ զտումների ու սեփական քաղաքացիների ճնշման համար:

Վերջին տարիներին Ադրբեջանում մարդու իրավունքների և ժողովրդավարության հետ կապված իրավիճակն էլ ավելի է վատթարացել իրավապաշտպանների, ընդդիմության գործիչների ու անկախ լրագրողների ձերբակալման և, իհարկե, Լեռնային Ղարաբաղի ավելի քան 100 հազար քաղաքացիների էթնիկ զտումների պատճառով: Կամայական ձերբակալություններն, անժամկետ կալանավորումը, դաժան ծեծը, խոշտանգումները և բռնի անհետացումները դարձել են մարդկանց ամենասարսափելի կերպով ճնշելու համակարգային միջոցներ:

Այս տարի քաղբանտարկյալների թիվը եռապատկվել է, քանի որ ռեժիմը ձգտում է, որպեսզի ընդդիմության բոլոր ձայները լռեցվեն նոյեմբերին կայանալիք COP29 համաժողովի նախաշեմին:

Ցավալի է գիտակցել, որ համաշխարհային տերությունները շարունակում են աջակցել մոլորակի ամենավատ ռեժիմներից մի քանիսին, և փողը հերթական անգամ վտանգում է մարդու իրավունքները: Այս բոլոր գործողությունների լույսի ներքո ակնհայտ է, որ Վեհաժողովը ճիշտ է վարվել՝ հրաժարվելով այս տարվա սկզբին վավերացնել Ադրբեջանի պատվիրակության լիազորությունները: Մեր արժեքները պետք է հիմնված լինեն ժողովրդավարության, մարդու իրավունքների և օրենքի գերակայության վրա։

Ադրբեջանական ռեժիմը հավատում է այլընտրանքային պլուտոկրատիայի, խոշտանգումների և ահաբեկչության կառավարմանը: Կարծում եմ, որ ժամանակն է նախաձեռնել Նախարարների կոմիտեի և Խորհրդարանական վեհաժողովի միջև լրացուցիչ համատեղ ընթացակարգ՝ կապված Ադրբեջանի կողմից իր կանոնադրական պարտավորությունների բազմաթիվ լուրջ խախտումների հետ»:

AlphaNews.am