Ալավերդյան. Դիմում եմ ՌԴ-ին՝ պահանջելով, որ թույլ չտա Արցախի իշխանության խայտառակ դատավարությունը

Մենք այստեղ ենք մեկ պահանջով՝ թույլ չտալ Բաքվի բանտերում գտնվող հայ գերիների խայտառակ դատավարությունները: Այս մասին այսօր՝ հոկտեմբերի 11-ին, Երևանում ՌԴ դեսպանատան դիմաց ակցիայի ժամանակ ասաց ՀՀ Մարդու իրավունքների նախկին պաշտպան Լարիսա Ալավերդյանը, ով ելույթ ունեցավ ռուսերենով:

Նա նշեց, որ Ադրբեջանը ցեղասպանական գործողություններ է կատարել Արցախի Հանրապետությունում 2020-2023 թվականներին, երբ այնտեղ գտնվել են ռուս խաղաղապահներրը:

«մենք ձեզ դիմում ենք ոչ այն հարցերով, որոնք հնչում են բոլոր սոցցանցերում՝ թե որտեղ էիք դուք, ինչ էիք անում և ինչու Արցախի Հանրապետության ռազմաքաղաքական ղեկավարությունը այսօր հայտնվել են անօրինական կալանավորված վիճակում՝ գտնվելով Բաքվի բանտերում և ենթարկվելով դաժան վերաբերմունքի ու կտտանքների:

Մենք դիմում ենք ձեզ ոչ թե միայն որպես մեծ տերության, ՄԱԿ-ի անվտանգության խորհրդի մշտական անդամի, մենք դիմում ենք ձեզ որպես 2020 թվականի նոյեմբերի 9-ի եռակողմ հայտարարության առանցքային անդամի: Ոչ ոք այն չի չեղարկել, այդ եռակողմ հայտարարությունն ուժի մեջ է ու ձեր պարտականությունները մնում են ուժի մեջ՝ անկախ նրանից, թե ով ինչ է ասել Հայաստանի կառավարության անունից:

Մենք պահանջում ենո, որ COP29-ի ժամանակ հատկապես Ռուսաստանը, որպես հատուկ պարտավորություններ ունեցող, որպես տերություն, որը բարեկամություն է անում Հարավային Կովկասի բոլոր երկրների հետ, այդ թվում Ադրբեջանի հետ, մենք պահանջում ենք, որ դուք թույլ չտաք դատական խայտառակությունը, երբ դատելու են Արցախի հերոսական ժողովրդի ղեկավարությանը:

Մենք դիմում ենք ձեզ՝ օգտագործել դիվանագիտական բոլոր միջոցները, պահանջել ու հասնել Բաքվի բանտերում գտնվող բոլոր հայ գերիների ազատ արձակմանը»,- հայտարարեց Լարիսա Ալավերդյանը։

News.am