Նախատեսում ենք հետագա ներդրումներ ՀՌՀ-ում. ՌԴ կրթության փոխնախարար

Ռուսաստանի իշխանությունները նախատեսում են ընդլայնել ներդրումները Երևանի Հայ-ռուսական (Սլավոնական) համալսարանում: Այս մասին հայտնել է ՌԴ գիտության և բարձրագույն կրթության փոխնախարար Կոնստանտին Մոգիլևսկին` մեկնաբանելով Հայաստանի և Ռուսաստանի միջև նոր համաձայնագրի ստորագրումը։

Դեկտեմբերի 20-ին ստորագրված փաստաթուղթը թարմացնում է համալսարանի աշխատանքի պայմանները։

Մոգիլևսկին հիշեցրել է, որ Սլավոնական համալսարանը արդեն ավելի քան 25 տարի բարեհաջող աշխատում է 1997 թվականի համաձայնագրի հիման վրա։ Սակայն այս ընթացքում փոխվել են և օրենսդրությունը, և կրթական հաստատությունների կառավարման պայմանները։

«Հայաստանցի գործընկերների հետ միասին մենք փորձել ենք հնարավորինս ճշգրիտ արձանագրել համալսարանի կառավարման և կրթական ծրագրերի իրականացման բոլոր կողմերը»,-նշել է փոխնախարարը:

Այսօր ՀՌՀ-ում սովորում է ավելի քան 5000 ուսանող` ավելի քան 120 կրթական ծրագրերով: Համալսարանը կարևոր հարթակ է դարձել ռուսաց լեզվի, հայ-ռուսական համագործակցության և համատեղ գիտական հետազոտությունների առաջխաղացման համար:

«Նոր համաձայնագիրը հետագա զարգացման հնարավորություններ է բացում։ Մենք ուզում ենք, որ երիտասարդները ժամանակակից կրթություն ստանան և հաջող կարիերա կառուցեն»,-ընդգծել է Մոգիլևսկին։

Հատուկ ուշադրություն է հատկացվում կրթական պայմանների բարելավմանը: Վերջին տարիներին համալսարանն ակտիվորեն թարմացնում է իր նյութատեխնիկական բազան. ժամանակակից վերանորոգում է իրականացվել մի շարք տարածքներում, ձեռք են բերվել սարքավորումներ, բացվել է նոր մասնաշենք և սպորտային համալիր: Այս ամենը, Մոգիլևսկու խոսքով, նպաստում է ուսանողների թվի ավելացմանը։

«Մենք շարունակելու ենք ներդրումներ կատարել ոչ միայն կրթության, այլև համալսարանական գիտության մեջ։ ՀՌՀ-ում աշխատում են ուժեղ մասնագետներ, հատկապես այնպիսի ոլորտներում, ինչպիսիք են կենսատեխնոլոգիաները, գենոմային և քվանտային տեխնոլոգիաները: Հումանիտար առարկաները, ներառյալ՝ արևելագիտությունը և իրանագիտությունը, նույնպես բարձր մակարդակի վրա են»,-նշել է նա։

Ռուսական կողմը մտադիր է ակտիվորեն աշխատել համալսարանի հետագա զարգացման ուղղությամբ, որպեսզի ամրապնդի նրա դիրքերը որպես կրթական և գիտական կենտրոն:

Sputnik Արմենիա