Թեհրանը չի փոխի իր քաղաքականությունը, այսպես կոչված, «Զանգեզուրի միջանցքի» հարցում. Իրանցի վերլուծաբան

Իրանը չի փոխվել և չի փոխի իր քաղաքականությունը այսպես կոչված «Զանգեզուրի միջանցքի» հարցում։ Այս մասին հունվարի 9-ին NEWS.am -ի թղթակցի հետ զրույցում ասաց իրանցի վերլուծաբան Պույա Հոսեյնին։

Նա հստակեցրեց, որ տարածքային ամբողջականության պահպանումը շարունակում է «կարմիր գիծ» մնալ Թեհրանի համար։

Փորձագետը նշեց, որ միշտ պետք է պատրաստ լինել Ադրբեջանի և Թուրքիայի սպառնալիքներին, որոնք փորձում են ստանալ միջանցք։

«Իրանն ու Հայաստանը պետք է բարձրացնեն իրենց դիմադրողականությունը։ Հայաստանի Հանրապետության տարածքով անցնող ճանապարհները պետք է լինեն Հայաստանի ենթակայության և վերահսկողության ներքո. Սա «կարմիր գիծ» է Թեհրանի և Երևանի համար»,- հավելել է նա։

Հոսեյնին նշեց, որ Իրանի և Ռուսաստանի միջև համապարփակ գործընկերության համաձայնագիրը մշակվել է երկար տարիներ, և դրա ստորագրումը կօգնի խթանել տնտեսական հարաբերությունները Ռուսաստանի, Չինաստանի և այլ երկրների հետ։

«Նաև հաշվի առնելով, որ Իսլամական Հանրապետությունը երկար տարիներ գտնվում է պատժամիջոցների տակ, նա ձգտում է համագործակցություն հաստատել ՇՀԿ-ի, ԵԱՏՄ-ի և այլ կազմակերպությունների հետ։

Իրանը երկար ժամանակ ձգտել է մեծացնել իր ռազմական հնարավորությունները՝ իր տարածքային ամբողջականությունը պաշտպանելու համար։ ԻԻՀ-ն կօգտվի այս փաստաթղթի հնարավորություններից՝ բարձրացնելու իր պաշտպանունակությունը, բայց միշտ ձգտում է ինքնուրույն զարգացնել իր պաշտպանական ներուժը»,- ընդգծել է վերլուծաբանը։

Նա ասաց, որ միևնույն ժամանակ Իրանը դիվանագիտական ​​ուղիներով ձգտում է վերսկսել միջուկային ծրագրի և պատժամիջոցների շուրջ բանակցություններն ամերիկյան նոր վարչակազմի հետ։

Հոսեյնին պարզաբանեց որ Թեհրանն առաջնահերթություն է համարում հակասությունների կարգավորման խաղաղ ճանապարհը, սակայն պատրաստ է բոլոր սցենարներին։