Դեսպան․ ՌԴ-Իրան պայմանագիրը կազդի տարածաշրջանի անվտանգության ոլորտի համագործակցության վրա

ՌԴ-ի և Իրանի միջև համապարփակ ռազմավարական համագործակցության մասին համաձայնագիրը կազդի Մերձավոր Արևելքի անվտանգության ոլորտում երկու երկրների համագործակցության վրա։ ՌԻԱ Նովոստիին այս մասին ասել է Ռուսաստանում Իրանի դեսպան Քազեմ Ջալալին:

«Անկասկած, կազդի, որովհետև և՛ Իրանն է տարածաշրջանում ուժեղ և ազդեցիկ երկիր, և՛ Ռուսաստանն է մեծ և ուժեղ երկիր։ Ուստի բնական է, որ մենք Ռուսաստանի հետ կենտրոնացրել ենք և կկենտրոնացնենք մեր բոլոր հնարավորությունները տարածաշրջանում կայունություն և անվտանգություն պահպանելու համար», – ասել է դեսպանը։

Նրա խոսքով՝ Արևմտյան Ասիայում գտնվող արտատարածաշրջանային ուժերն իրենց համարում են անվտանգության պատասխանատու, բայց հենց նրանք են ապակայունացման պատճառ դարձել, քանի որ գործում են իրենց օգտին և չեն մտածում, թե ինչն է օգտակար տարածաշրջանի համար:

«Այնպես որ այս համաձայնագրում շոշափվում են նաև այնպիսի ոլորտներ, ինչպիսիք են աշխարհի միաբևեռության դեմ պայքարը, բազմաբևեռության պաշտպանությունը, համագործակցությունը տարածաշրջանային և միջազգային մակարդակներում», – նշել Է դիվանագետը:

Հիշեցնենք` ըստ Կրեմլի մամուլի ծառայության` հունվարի 17–ին կկայանան ՌԴ–ի և Իրանի նախագահներ Վլադիմիր Պուտինի և Մասուդ Փեզեշքիանի բանակցությունները, որոնց ընթացքում առաջնորդները մտադիր են քննարկել երկկողմ համագործակցության ընդլայնման հեռանկարները և տարածաշրջանային ու միջազգային արդիական հարցեր: Բանակցությունների ավարտին նախագահները կստորագրեն Ռուսաստանի և Իրանի միջև համապարփակ ռազմավարական գործընկերության մասին պայմանագիր, ինչպես նաև հայտարարություններ կանեն ԶԼՄ-ների համար: Նոր պայմանագիրը կոչված է փոխարինելու երկրների միջև գործող` փոխհարաբերությունների հիմունքների և համագործակցության սկզբունքների մասին փաստաթուղթը, որը ստորագրվել է դեռևս 2001 թվականին Մոսկվայում:

Sputnik Արմենիա